مشاكل اجتماعية للنقاش
القلب يحب مرة
في هذا المقال سوف اعرض عليكم مشكلة اجتماعية لشاب اخلص في حبه و جاءته الصدمة من اغلي الناس سأضع لكم ردي عليه و انتظر ارائكم في المشكله مع العلم أنه سوف يقرأ ارائكم مشكلة اجتماعية وحلها
 |
| مشاكل اجتماعية للنقاش |
مشكلة النهارده
انا شاب عندي ٢٧ سنه متخرج من ٥ سنين و بشتغل مع ابويا في المحل بتاعه - هو عنده معرض موبيليا - لما كنت في تالته كليه جالنا واحد من جيراننا هو و بنته و قال لي أن بنته رايحه أولي كليه و تنسيقها نفس الكليه اللي انا فيها يعني معايا في نفس الكليه و كان بيوصيني عليها لأننا عايشين في ارياف دمياط و كليتنا في جامعة المنصورة و هنروح و نرجع كل يوم البنت كان شكلها بريئه جدا و غلبانه
فعلا انا اخدت بالي منها و الله كأنها حد من اهلي
حتي هي كانت بتقول لي انا حاسه ان امي و ابويا معايا في الكليه
اتعلقت بيها و حبيتها و تخيلت حياتنا كلها سوا و هي كانت شكلها بتحبني و مش رفضاني ابدا
فاتحتها في الموضوع ده قبل ما اتخرج بشهر بس مدتنيش اجابه واضحة قالت لي انت لسه قدامك جيش و انا قدامي سنتين في الكليه و ده مش وقت مناسب
فعلا انا رحت الجيش و كنت بتصل بين وقت و التاني و كانت بترد عليا
و خلصت الجيش و قلت أنا لازم اروح اتقدم لها
ابوها قال لي انت الف واحده تتمناك يا بني بس معلش فلانه اتقري فاتحتها علي واحد قريبهم دكتور في دمياط
و قال لي ان الدكتور ده كان متكلم عليها من زمان
المشكله أنها عمرها ما جابت لي سيرة و كانت بتتعامل معايا عادي و اتخطبت فعلا و اتجوزت بعد ما خلصت كليه علي طول و مشفتهاش من بعدها
الكلام ده عدي عليه سنتين دلوقتي و انا بردو مش عارف اشوف حد تاني
و كل يومين اهلي يعرضوا عليا أخطب و يقترحوا عليا بنات
و في النهاية عشان اريح ابويا و امي وافقت أخطب بنت ناس معرفه
انا قلت مش فارقه اي واحده و خلاص
دلوقتي بقالنا ٣ شهور مخطوبين و مش حاسس خالص أن انا خاطب ، حاسس انها غريبه عني تماما و لا ببقي عايز اعرف عنها حاجه و لا يهتم بتفاصيل حياتها و كمان بزهق من سؤالها عني و اهتمامها بيا رغم أنها مش بتتصل كتير
مش لاقي اي دافع يخليني اكمل حاسس ب فتور رهيب
مع ان البنت رقيقه و جميله بس هي ملهاش اي ذنب المشكله فيا انا مش فيها
مش عايز اظلمها و لا اظلم نفسي و لا ازعل اهلي و مش عارف اكمل معاها و لا ابعد عنها و لو هسيبها اقول ايه من غير ما اجرحها لأنها فعلا تستاهل كل خير
انتهت قصة الشاب و هذا هو ردي عليه
شوف يا ابو الشباب 😊
اولا انت اتعلقت فعلا بزميلتك و جارتك لكن متقدرش تقول إن اللي بينكم كان حب
الحب من طرف واحد احساس في منتهي النبل و الاخلاص بس انت بتكون مهتم و قلقان و محب و بتتمني الرضا و السعاده للطرف التاني و في المقابل هو مشاعره من ناحيتك صغر ، ده هيألمك و هتحس بالخذلان ، و في وقت ما ممكن تكره انك حبيت الشخص ده ، لانه في وادي اخر بعيد و مش حاسس بيك و لا بعذابك
لكن صدقني الحب المتبادل هو الحب الحقيقي ، لما بتلاقي شخص بيبادلك مشاعرك و بيهتم بيك زي ما انت مهتم بيه و بيدور علي سعادتك زي ما انت بتدور علي سعادته ، ده بيحافظ علي بقاء الحب و الود و بيزوده كمان
تجربتك دي تجربة و عدت تقبلها بحلوها و مرها لأن واضح ان زميلتك مكانتش حاسه بأي حاجه ناحيتك و هي بس مكانتش بتحب تحرجك و تواجهك بحقيقة مشاعرها و يمكن هي اتكسفت تقول لك أن في شخص تاني في حياتها عشان ممتنه ليك و شايله لك الجميل و المعروف اللي انت عملته معاها ، منقدرش نلوم عليها
أما انت يا صديقي لازم تتحرر من كل الضغوط ، افسخ الخطوبه بشكل أو بآخر و طبعا من غير ما تجرح خطيبتك
و تحرر من ضغوط اهلك و ادي نفسك فرصه للتعافي و اوعدك هييجي يوم قريب و تلاقي نفسك مستعد للارتباط ، و مش ضرورى قصة حب كبيرة عشان ترتبط
مجرد القبول و الارتياح و الاختيار الصح يكفي انك تبدأ حكايه جديده
و مع الاهتمام و الاحترام و الود هتقدر تبني بيت جميل و أسرة مستقرة ، ادعي ربنا كتير يوفقك و يريح قلبك و يرزقك ب بنت الحلال
و طبعا لازم تعتذر اعتذار كبير للبنت اللي انت هتسيبها دي و يفضل تفهمها السبب ، و يفضل كمان لو كنت جبت لها أي هديه سيبهالها و ربنا يعوضها و يسعدها
مع تمنياتي لك بالسعادة و راحة البال 🌹🌹
انتظر بشغف ارائكم و تعليقاتكم رزقكم الله جميعا السعاده و راحة البال 🌹❤️
الكلمة المفتاحية #مشاكل #اجتماعية #للنقاش
لا تفوتك قصة حب فى العناية المركزة