 |
| قصة قصيرة بالعربية |
من يوم ما اتجوزت و انا حاسه ان جوزي و اهله عايزين يستغلوني ، كتير كنت بكدب احساسي ده عشان اقدر اتعامل معاهم و اعيش بس الحقيقه اللي همه عملوه كان مفاجئ ليا و لاهلي و لاصحابي
انا نسمه و دي حكايتي
اتجوزت يوسف من ٤ سنين ، جواز عادي مكانش فيه قصة حب كبيرة بس من ساعة ما اتخطبنا لاحظت أن يوسف مبيجببليش هدايا بس ده كان عشان هو بيحوش كل مليم عشان ترتيبات العفش و الفرح
و اهله مكانوش بييجوا يزورونا في الأعياد والمناسبات لأنهم من محافظة تانيه بسبب ان السفر تعب عليهم
لدرجة أنهم مزاروناش طول فترة الخطوبة الا مرتين مرة في الخطوبه و مره في كتب الكتاب
بعد ما اتجوزنا باسبوعين طلب مني نروح نزور أهله و فعلا رحنا و اخواته البنات ، بنتين واحده ادي و واحده اكبر مني الكبيره متجوزة و الصغيرة مخطوبه بعد ما سلموا عليا و قعدوا معايا شويه قالوا لي هدومك حلوة اوي يا نسمه
قلت لهم شكرا ، اتفضلوها متغلاش عليكم ، قالوا بجد و الله
استغربت و قلت هو ايه اللي بجد
قالوا ناخد الحاجات اللي عاجبانا
قلت انهي حاجات اللي عاجباكم
قالوا الحاجات اللي انتي جايباها معاكي في شنطة السفر
قلت و انتوا عرفتوا ازاي شكل الحاجات اللي في شنطة السفر
أخته الصغيرة قالت ما احنا فتحناها و فضيناها
و الكبيرة كملت بسرعه و قالت فضيناهالك في الدولاب عشان تبقي براحتك وتحسي أن ده بيتك يعني
انا اتصدمت و سكت
بالليل أخته الصغيرة جت و قالت و النبي يا نسمه خطيبي جاي يخرج معايا و معلش هاخد فستانك اخرج بيه أصله حلو اوي
قلت ماشي
قالت و الطرحه عشان يبقي طقم علي بعضه
قلت ماشي
قالت معلش و الصندل اللي بكعب أصله حلو اوي
قلت لها معرفش إذا كان هيبقي مقاسك
ردت بسرعه و قالت مقاسي متقلقيش
قلت ماشي اتفضلي
طلعت من الاوضه جري حتي من غير ما تقول شكرا و سمعتها و هي بتقول لمامتها في الاوضه التانيه ..خدتهم!
المهم علي اخر الإجازة كانوا خدوا تقريبا كل حاجه انا جايباها معايا
حتي مامتهم خدت الطرحه و الشبشب اللي كنت جايباهم البسهم في البيت
و انا مروحه جوزي قال لي معلش بكره اجيب لك احلي منهم و بعدين انتي اللي زوقك حلو بيبهر الناس كلها اعمل لك ايه
بعد ما روحنا بيومين جه قعد معايا و هو جايبلي شيكولاته و قهوة و قال لي تعالي نقعد نتكلم في البلكونه عايزة اتكلم معاكي في موضوع
رحت معاه و كان محرج جدا و بعد مقدمات كتير عن الشغل و أنه نفسه يكبر في شغله عشان نعيش في مستوي احسن و أنه قدامه فرصه كويسه جدا بس محتاج سيوله
فضل يلمح و انا مش فاهمه هو يقصد ايه ، لغاية ما قال لي و هو في منتهي الكسوف اديني الدهب اللي معاكي و في ظرف شهور هرجعهولك و بزيادة
انا سكت شويه مش عارفه اقول ايه
بس هو فضل يتحايل عليا و يعرفني اد ايه الفرصه متتعوضش و يوعدني إن كل جرام هياخده هيرجعهولي اتنين
و أن ده كله عشاني اصلا و عشان هو عايزني اعيش في مستوي احسن و حسيت هو اد ايه نفسه يسعدني
انا قلت مفيش فرق بيننا و خد الدهب طبعا
خد كل الدهب شبكتي و حتي الدهب اللي كان معايا من قبل ما نتخطب و كان كميه مش قليله
باعه و اشتغل و كسب فعلا و اول حاجه اشتراها عربيه جديده
قال لي أنه مش عايزني اتبهدل في المواصلات خصوصا و انا حامل و أن ولي العهد لازم ييجي يلاقي أهله عندهم عربية ملاكي
قلت له كان أولي تجيب لنا شقه
قال لي الخطوة الجايه
و عدت الايام و احنا عايشين كويس و في نعمه من عند ربنا و كان كل شهر بيحول مبلغ كبير لأهله عشان مصاريف والده و والدته و كمان عشان جهاز أخته
لغاية ما في يوم
حصل مشكله كبيرة عنده في الشغل و خسر تقريبا كل اللي حيلته و بقينا عالحديدة
و بقينا نصرف عالبيت من مرتبي انا وكانت والدته دايما تطلب فلوس
و طبعا مرتبي مش مكفي
و هو مش مستغني عن العربيه
و أهله بيطلبوا كل شويه
لدرجة أنه ادالهم الديب فريزر بتاعي بحجة أنهم محتاجينه و اني عندي تلاجه كبيرة مش محتاجه له
و بدأت المشاكل بيننا و كل يوم خناقات
سبت البيت و اخدت ابني و رحت بيت اهلي
قعدت عندهم فترة طويله و مفيش فايدة و كل محاولات الصلح كانت بتفشل لانه مش موافق يتنازل عن اي حاجه
لحد ما في يوم صاحبتي و جارتي اتصلت بيا و قالت لي في حاجه غريبه بتحصل في شقتك
قلت لها ايه0
قالت معرفش
بس الصنايعيه داخلين طالعين و حاجات جديدة بتدخل الشقه
الوضع ميطمنش
قلت لها هيعهمل ايه يعني
قالت هيتجوز يا هبله
قلت لها يا بنتي ده محيلتوش حاجه
عملنا تحرياتنا و بعد البحث اكتشفنا أنه بيتجوز !!
بيتجوز بنت غنية جدا بس كبيرة شويه في السن و ده مش عيب فيها طبعا بس هو اختار دي بالذات لأنها غالبا هتوافق
و في نفس الوقت كان بيتصل كل فترة علي اساس أنه عايز يرجعني و بيطمن عليا و ع الواد
انا بقي مبينتلوش اني عارفه حاجه خالص
و طلعت عالمحكمة و رفعت دعوي تطليق للضرر و استنيت
لغاية ما جه يوم الفرح
بمساعدة صاحبتي و عم عبدالحكيم بواب العماره اخترنا وقت تكون الشقه فاضية فيه بين المغرب و العشاء
و سبت ابني عند اختي و رحت فتحت الشقه
و فضيت ٥ جراكن جاز ع العفش كله
الحقيقة انا كنت بفكر أولع له فيها اللي جايب واحده علي عفشي
و بعدين خفت من ربنا
و خفت كمان النار تإذي حد ملوش ذنب
و بعدين قفلنا الشقه و دخلت شقة صاحبتي خدت شاور و لبست احلي فستان و احلي جزمة و احلي مكياج و رحت الفرح
اول حاجه و قبل ما ياخد فرصه طلبت من بتاع الدي جي اتكلم في الميكروفون و فضحته هو و اهله
و في الاخر قلت الف مبروك للعروسين
الف مبروك يا عريس يا عرة و انتي يا عروسه تتهني بيه يا حبيبتي ده انتي اخدتي اكبر مقلب و ان شالله تدخلي بيوتهم و معاكي الخراب و انا هتطلق منك و نتقابل في المحكمة بصيت له بقرف و مشيت
حسيت بعدها ان حقي رجع لي و هعيش انا و ابني في سلام و ربنا يكون في عون العروسة الجديدة