قصة خيالية قصيرة
قصة خيالية جميلة اعدك انك لن تمل منها ارجو ان تعجبك القصة و انتظر ارائكم في التعليقات قراءة ممتعه للجميع
 |
| قصة خيالية قصيرة |
و الان اترككم مع قراءة قصة خيالية قصيرة اتمني تعجبكم
كامل قرب مني و قال لي بكل حنيه متخافيش ابدا ، و انا موجود مش ممكن اسيب حاجه تإذيكي و لا هسمح بده ابدا يا حبيبتي قلت له شكرا يا كامل علي شعورك ده و مد لي أيده عشان ياخد ايدي و يساعدني عشان اقوم ، لقيت ايمن واقف قدامي و بيقولي اوعي تمسكي أيده يا ليلي اوعي تقربي منه
سحبت ايدي بسرعه !! كامل اتنهد بزهق و قال في ايه تاني يا ليلي ؟ قلت له ايمن جوزي بيكلمني !! ايمن جوزي واقف قدامي
كامل بعد عني و اتنرفز جدا و قال بصوت عالي حرام عليكي يا ليلي انا تعبت ايمن مات من سنه .. مات .. فوقي بقي
انتي مستعده تبدأي معايا من جديد و لا لأ
حسيت أن انا مكسوفه اوي من نفسي
رحت جنب كامل و قلت له انا اسفه انا اعصابي تعبانه جدا معلش حقك عليا يالا نخرج من هنا
و مسكت أيده و يا دوب هنتحرك لقيت ايمن واقف قدامي مباشرة و بيقولي يا ليلي متخرجيش معاه
اتخضيت و وقفت
كامل بنفاذ صبر قال و بعدين بقي ،
قلت له ايمن بيقولي متخرجيش ، معلش يا كامل و الله انا سامعاه و شايفاه فعلا
كامل فقد أعصابه و قال بقول لك ايه يا ليلي انا موجود و انتي عارفه رقمي لما تحسي انك بقيتي كويسه و مستعدة تبدأي حياتك من جديد كلميني و مشي
ايمن قرب مني و اتكلم و قال سيبيه يمشي و ابعدي عنه
رفعت ايدي عشان المس وش ايمن لقيت أن ايدي بتعدي من خلال وشه لأنه هوا
حسيت اني دايخه و قلت لنفسي لا لا اللي بيحصل لي ده مش طبيعي انا تعبانه جدا و محسيتش بنفسي بعدها
بعد وقت معرفش هو اد ايه فقت و لقيت نفسي واقعه عالارض في الصالة و فهمت أن انا اكيد أغمي عليا بعد الموقف اللي حصل ببص جنبي لقيت ايمن قاعد جنبي و اعتذر
و قال يا ريتني كنت قادر افوقك و لا اجيب لك حتي كوباية مياه
قلت له بالظبط ، انت مجرد خيال و متقدرش تعمل حاجه
قال لي لا انا ايمن جوزك
قلت له جوزي مات في حادثة العربية من سنه انت مش حقيقي انت بس موجود في خيالي بسبب أن انا حاسه بالذنب عشان انا هتجوز صاحبك
ايمن قال لي ده مش حقيقي انا موجود هنا اكيد لسبب
قلت لنفسي انا ايه اللي بعمله ده انا لو فضلت اكلم شبح هتجنن قريب
اقرا ايضا قصة الساحل الشمالى من هنا
مسكت تليفوني و طلبت كامل و لسه بقول له تعالي
ايمن بص لي بخوف و قلق
و قال لا لا لا لا متخليش كامل ييجي
ليه
كامل ده مجرم
انت بتقول اي كلام
صدقيني يا ليلي انا خايف عليكي منه
مجرم ازاي يعني و خايف عليا منه ليه
انا ممتش يا ليلي ، انا اتقتلت كامل قتلني عشان يقدر يوصل لك ، مكانتش حادثة عادية
و لقيت كامل وصل و دخل البيت و كان جايب لي بوكيه ورد جميل خالص اداهولي و قال لي بابتسامه لقيت الباب مفتوح دخلت ، و قال تعالي اقعدي و استهدي بالله كده دي فترة و هتعدي كل اللي بيحصل ده تهيؤات ، انا جنبك و مش هسيبك ابدا ده انا بقالي عمر مستني اللحظة دي
قلت له فعلا انت عندك حق دي تهيؤات و ابتسمت له و طبطبت علي أيده ، بس معرفش ليه بيني و بين نفسي كنت حاسه ان كلام ايمن ممكن يكون صح
كامل قال انسي بقي كل ده و انا مستعد انام هنا علي الكنبه دي عشان تكوني متطمنه و تعالي بكره نكتب كتابنا عشان افضل موجود معاكي علي طول و كان بيحاول يسند راسي علي كتفه بس انا سحبت نفسي و قمت بسرعه من جنبه
قال لي في ايه يا ليلي ؟ ببص قدامي لقيت ڤاز قلت له هحط الورد في ال ڤاز و احط له مياه
قال طب خليها بعد شويه
سحبت ايدي و قلت له ٥ دقايق مش هتأخر
بص لي بصة غريبه و قال ماشي انا استنيت ده كله مجتش علي ٥ دقايق
دخلت المطبخ بسرعه و صبيت مياه في ال ڤاز لقيت ايمن واقف جنبي و قال لي براڤو عليكي يا ليلي اوعي تسيبيه يقرب منك
قلت له يا اما تثبت لي ان انا مش مجنونة و انك موجود فعلا يا اما تمشي و مش عايزة اشوفك تاني
قال لي الدليل في شنطة كامل الصغيرة اللي شايلها علي طول
روحي هاتيها بسرعه و اوعي يشوفك
طلعت من المطبخ و انسحبت كان حاطط شنطته علي كرسي جنب باب الشقه ، اخدتها و رجعت المطبخ بسرعه تاني
فتحت الشنطة و دورت فيها و اتفاجأت فعلا من اللي لقيته
سلسلة نص القلب بتاعة ايمن كانت فيها
السلسله دي جبناها في عيد جوازنا الاخير و اتفقنا منشيلهاش من رقبتنا ابدا و هي سلسله فضة عبارة عن قلب مقسوم نصين ايمن لابس نص و انا لابسه نص
ايمن قال كامل كان بيتضايق جدا كل ما يبص و يشوف السلسله في رقبتي بس مكنتش فاهم ليه شكله كان بيحبك من زمان
قال لي كامل قتلني يا ليلي في اليوم اللي كنت مسافر فيه سفرية الشغل المنحوسه دي كامل جالي الشركة قبل السفر مباشرة و فضل معايا لغاية ما وصلني للعربيه و قال لي عايز اتكلم معاك و راح جاب لنا اتنين قهوة نشربهم في العربيه و احنا بنتكلم و شربنا القهوه فعلا
اكيد هو كان حاطط لي حاجه في القهوة و كان متنرفز جدا و فضل يقول لي كلام كتير شبه أنه انا مستاهلكيش و المفروض أن انا و انتي نبعد عن بعض و قال لي أنه هيعمل كل اللي يقدر عليه عشان يفرقنا
انا كنت اول مره اشوفه بالشكل ده ، طردته من العربيه و قلت لما ارجع من السفر ليا حساب تاني معاه
و طلعت علي الطريق الصحراوي الدنيا ليل و عنيا مزغلله و مش عارف اركز و بعد شويه معرفش ايه اللي حصل و عملت الحادثه و جالي كامل و انا واقع علي الاسفلت و دماغي بتنزف قلت له انقلني المستشفى
قال لي ششششششش متتكلمش انا هفضل جنبك هنا لغاية ما تموت و بالنسبه ل ليلي متخافش عليها انا هاخد بالي منها كويس جدا و مد أيده شد السلسله من رقبتي و اخدها حطها في شنطته
و انا مذهوله من اللي ايمن بيقوله سمعت صوت كامل بيقول ايه يا حبيبتي ال ٥ دقائق عدوا
بصيت ل ايمن بخوف
ايمن قال لي قولي له جايه حالا و اوعي يبان عليكي حاجه خليكي فاكره أنه مجرم
قلت جايه حالا
ايمن بص لي و قال انا مش عارف فاضل لي وقت اد ايه بس عايز اتطمن عليكي اخرجي و اتعاملي عادي و هنشوف حل اكيد ، بس الاول رجعي شنطته مكانها بسرعه من غير ما يحس
خرجت وديت شنطته و لسه بتلفت لقيته قدامي ، قال لي بابتسامه بتعملي ايه ؟
بيبص ورايا لقي شنطته مفتوحه ، شكله اتغير و وشه قلب تماما و عنيه كانت بتطلع شرار و قال انتي بتفتشي في شنطتي
قلت له اه يا ….
ايمن اتكلم بسرعه و قال اوعي يا ليلي اوعي يفهم أن انتي عرفتي الحقيقه ده مجرم خطير
بس انا مقدرتش اسكت بقيت اضرب فيه بهستريا و ازعق فيه و أقوله يا مجرم انت قتلت جوزي انا هوديك في ستين داهيه انا هروح ابلغ عنك و اخليك تترمي في السجن
قال لي انتي مش هتروحي اي مكان اصلا
زقني ناحية الحيط و بدأ يخنقني و انا مش قادره اقاوم و سمعت صوت خبطه جامده و لقيته فجأه وقع عالارض ببص لقيت ايمن ماسك خشبه كبيرة ف أيده و هو اللي خبط كامل
بصيت له و قلت انت عملت كده ازاي
قال مش عارف ، يمكن من شدة خوفي عليكي
رحت لمست أيده لقيتها حقيقيه
مسك السلسله التانيه و لبسهالي في رقبتي و ركبها علي بعضها و جمع القلب
و غمض عنيه و حضني و قال اخر لحظة في حياتي و انا كنت بموت دي اخر أمنية اتمنيتها اني المسك
قلت له ارجوك خليك معايا ،
قال انا مقدرش افضل هنا ، و انتي لازم تكملي في حياتك و انا هفضل حواليكي باستمرار متخافيش و بكره هتقابلي الشخص اللي يحبك و يخاف عليكي مش المجرم ده
ضميت نفسي ليه اكتر و فجأه سمعت صوت كامل بيفوق فتحت عيني ملقيتش ايمن و لقيت كامل بيرفع رأسه
قمت بسرعه عشان اهرب و كامل قام و بقي يجري ورايا
في الشارع ربنا سترها معايا و لقيت عربية بوليس واقف و جنبها ٢ ظباط
رحت جري عليهم و قلت الحقوني المجرم ده عايز يقتلني ، كامل شافنا كان لسه هيهرب قام الظابط رفع المسدس و قال له اثبت مكانك
و فعلا حطوا الكلبش في أيديه و ركبوه العربيه
و الظابط ابتسم لي و قال انتي فيكي حاجه غريبه جدا
انا اسمي زين ارجوكي تقبلي انك تشربي معايا الشاي مره
لمست السلسله اللي في رقبتي و بصيت قدامي شفت طيف ايمن بيبتسم و بيشاور لي اوافق
قلت الظابط موافقه ،
ابتسم جدا و قال اتفضلي معايا تحكيلي الحكايه كلها و ننهي الإجراءات
و بعدها نشوف موضوع الشاي
ابتسمت و قلت اتفضل ..
تمت ..
اذا اعجبتك القصة اكتب لى تعليق
و يمكنك قراءة القصة التى نالت الاف المشاهدات قصة قلوب لا تعرف الحب من هنا