قصة وعبرة زوجتى و المدير

مشاكل زوجية و اجتماعية مع الحل 3 مشاكل توجع القلب 

دول ثلاث مشاكل زوجية جت لي على رسائل صفحتى حاولت الرد عليهم  بالحل المناسب و اتمنى انكم تشاركونى الرأي و كل واحد يكتب الحل من وجهة نظره عايزين نحول الموضوع من مشاكل زوجية الى مشاكل زوجية وحلولها او نسميه حل مشاكل زوجية ربنا يوفقنى للحل الانسب و في انتظار تعليقاتكم 

مشاكل زوجية

صاحبة المشكله بتقول

انا معايا دبلوم تجارة و مبشتغلش كنت متجوزة من ٥ سنين و عندي ولدين جوزي كان بيشتغل يوم و يقعد ١٠ ايام

وحيد أبوه و أمه و هو الدلوعه بتاعهم

اتجوزنا صالونات عن طريق واحده قريبته تعرف امي

حمايا هو اللي بيصرف علي البيت حماتي بتاخد الفلوس و تروح السوق تجيب خضار و طلبات البيت

جوزي بقي الفلوس اللي بيشتغل بيها يا دوب بتكفي سجايره

من يوم ما اتجوزت ممسكتش جنيه في ايدي

لما بعوز حاجه العيال لازم اروح اقول ل حماتي و هي اللي تجيبها

كتير بيبقي نفسي في حاجات زي اللحمه أو الفراخ مثلا بس بتكسف اقول

حاولت مع جوزي كتير عشان اخليه ينزل يشتغل بس هو كان متدلع جدا و بيحب يأنتخ مبيحبش يتعب نفسه و كل ما يروح شغلانه يقعد فيها يومين و يسيبها

لما جه الولد التاني الوضع بقي اسوء لأن العيال عايزة مصاريف

ابويا كان احيانا بيبعت لي حاجات

مرة رز و مكرونة ، مرة صابون و بامبرز عشان الواد و لما كنت أقوله نفسي في اللحمه يا بابا كان بيعزمني عندهم و امي كانت بتعمل لي الاكل اللي بحبه

بس انا فاض بيا و قررت لازم اخد موقف و اقطع عرق و اسيح دم

طلبت من جوزي يشتغل يا اما هسيب له البيت بس هو زعق لي و قال لي انتي مالك اشتغل و لا لا 

و لما حماتي و حمايا سمعوا الزعيق جت حماتي قالت انتي ناقصك ايه ما انا بجيب لك كل حاجه في البيت انتي و عيالك

و حمايا قال لي لو عايزة حاجه يا بنتي قولي و احنا مش متأخرين عنك

قلت له انا عايزة انفصل بحياتي و جوزي يشتغل و يبقي لنا حياه عشان دي مش عيشه

حماتي قعدت تزعق و تقول انتي بتعلي صوتك علينا و بتغلطي في حماكي اللي معيشك انتي و عيالك

انا و الله ما كنت غلطت فيه انا كنت بتكلم بالراحه و هو اصلا راجل طيب انا بحبه زي ابويا

جه علي الصوت اخو حمايا ( عم جوزي )

حماتي فضلت تقول شفت الواطيه ناكرة الجميل بتشتم حماها و مش عاجبها عيشتنا عايزة تاخد الواد و تستفرد بيه

اخو حمايا ده اصلا مبطيقوش و لا هو بيطيقني

قال بزعيق انتي ازاي تشتمي حماكي

قلت أنا مشتمتوش 

حماتي قالت لا شتمتيه

قام اخو حمايا رفع أيده و ضربني علي وشي

كل ده و جوزي واقف معملش حاجه

بصيت له و قلت له انت مش هنتكلم و لا هترد

قال انتي غلطانه و تستاهلي

قلت له طيب انا مش قعدالك في البيت

راحت حماتي قالت عايزة تمشي مع الف سلامه بس مش هتاخدي عيالنا معاكي يا حلوة

انا دمي كان محروق و عايزة امشي بأي طريقه

خرجت من البيت حمايا جه ورايا و قال ارجعي يا بنتي و نقعد و نتكلم 

قلت له ما انت سبتني اتهان و اتضرب و معملتش حاجه

حاول معايا يرجعني بس انا صممت امشي

 رحت عند جارة ليا و حاولت اخلي جارتي تجيب لي العيال عشان اخدهم معايا بس حماتي كانت قافله عليهم تقريبا

مشيت و انا قلبي مقهور علي عيالي

روحت بيت اهلي مكسورة و كنت كل يوم بحلم أن ابني عيان و رايحه جري اشوفه الاقيه مات

كنت بقوم مفزوعه من الكابوس ده اقعد اعيط للصبح

ابويا بعت لهم ناس عشان يجيبوا لي عيالي بس مرضيوش

قالوا لو عايزاهم تجي لهم هنا يا اما تنطلق و تاخدهم

اتعذبت كتييييير من غير عيالي و مش قادرة ارجع المعتقل تاني خصوصا ان جوزي معندوش استعداد ابدا يتغير حتي لما كنت بقول له انا مش راجعه غير علي بيت لوحدي و عيشه مستقله قال لي مترجعيش عنك ما رجعتي و في الف واحده تتمني  تيجي مكانك 

في النهايه انطلقت و همه بيخيروني يا اما اسيب عيالي يا اما لو خدتهم انا اللي اصرف عليهم لانه هو مش هيبعت لي مصاريف

و هو عارف اني لو رحت المحكمه اطلب لهم فلوس هتبهدل و هصرف عالمحامي اكتر من اللي هيطلع لي في الاخر لأن جوزى مبيشتغلش

المحكمه هتحكم بمبلغ صغير خالص 

المشكله ان ابويا راجل عالمعاش و مرتبه مبيكفيش اصلا بالعافيه اكل و علاج و مصاريفه هو و امي

 و اخواتي الولاد  متجوزين و مستقلين بحياتهم من زمان

• ابويا بيقول لي سيبيهم يربوا العيال عشان يتربوا و متخافيش علي عيالك دول في وسط اهلهم 

 بس انا قلبي واجعني علي عيالي و يشوفهم كل اسبوعين يوم

حاسه اني هموت من الزعل عليهم

مش عارفه اعمل ايه

كده الرساله خلصت و ده ردى عليها

اولا يا حبيبتى ربنا يريح بالك و يجمعك انتى و اولادك فى مكان واحد قريبا

انتى هتروحى المحكمة و تطلبى حقك و القليل احسن من بلاش . الناس دول مستضعفينك و لازم تثبتى لهم انك قوية 

انتى قوية اولا بربنا ثانيا بان ليكى حق و ثالثا انتى قوية باهلك و باولادك

اوعى حسك عينك تسيبى اولادك عندهم 

هاتى عيالك و معلش الدنيا هتبقي صعبه فى الاول لكن صدقينى كل حاجه هتمشى و هتتصلح

انتى متعرفيش همه هيتعاملوا مع اولادك ازاى و ممكن طليقك يتجوز و ده وارد  جدا و هيجيب لهم مرات اب تبهدل فيهم

لازم تشوفى لك باب اكل عيش , شوفى انتى بتعرفي تعملي ايه و اعمليه 

زي ما قلت لك الاول الدنيا هتبفي مقفلة و صعبة بس صدقينى و الله هتمشي

في افكار كتير لشغلانات بسيطه تقدرى تعمليها , هتتعبي و هتتبهدلي انا عارفه

بس صدقينى التعب و اولادك في حضنك احسن من الراحه و همه بعيد

اما الناس دول ف تقطعى علاقتك بيهم تماما

همه اصلا غالبا مش هيكلموكى تانى و متتنازليش عن حقك فى نفقة اولادك ان شالله المحكمة تحكم ب 500 جنيه فى الشهر هيسندوا معاكي بردو

ربنا يريح بالك و يبارك لك فى اولادك

ده كان ردى على صاحبة المشكله و هقرأ ردودكم بردو و اكيد هى هتقراها

دمتم في حفظ الله و بعيدا عن المشاكل

و دى كانت القصة الاولى

القصة التانية اضغط هنا

القصة الثالثة اضغط هنا

تعديل المقال