قصة حب قصيرة
بنت الباشا
كلنا نبحث عن قصص حب قصيرة لقرائتها للتسلية سواء في وقت فراغنا او فى المواصلات او حتى قبل النوم و هذه قصة حب قصيرة بقلمى اتمنى ان تنال اعجابكم و ارجوا ان تتركوا لى رأيكم فى التعليقات
 |
| قصة حب قصيرة |
اسمي سوزان انا انتمي للطبقة المخملية زي ما بيسموها ابويا ملياردير مشهور الصحف و القنوات بتتابع أخباره و انا بنته الوحيدة يوم ما قرر يجوزني اختار بعناية ، اختار لي ابن صديقه و عمل كل التجهيزات ل زفاف اسطوري بتترقبه كل وسائل الإعلام ، كل حاجه معده بعناية و طبعا اتصرف عليها أطنان من الفلوس
قبل الفرح بيومين كنت خلاص انتقلت لل سويت اللي اتحجز عشاننا في الاوتيل اللي هيتعمل فيه الفرح و المفروض أن فستان فرحي اللي اتصمم عشاني مخصوص وصل من دار الأزياء و كنت داخله عشان اشوفه بعد ما خلص تماما ، و اللي شفته صدمني صدمة عمري و مش مصدقه عنيا فتحت و غمضت اكتر من مرة عشان اعرف استوعب اللي انا شايفاه
خطيبي بيحضن واحده و بيبوسها و هي لابسه فستان فرح … ركزت لاقيت أن صاحبتي مايسه لابسه فستاني بتاع الفرح و نازلين حب في بعض … انا كنت واقفه متجمده من الصدمه بعد دقيقه مايسه بترفع رأسها شافتني .. قامت زقت عماد خطيبي و بعدت عنه بسرعه و فكت طرحة الفرح من شعرها و جت بمنتهى الكسوف حطتها في ايدي و راحت بسرعه قلعت الفستان و ظبطته و علقته و خرجت من السويت بسرعه.
جه خطيبي و قالي بكل بجاحه معلش ده كان غلطة مش مقصودة ،
غلطة مش مقصودة ؟ يعني مايسه لبست فستاني من غير ما تقصد ؟ و انت اخدتها في حضنك من غير ما تقصد و كنت بتبوسها من غير ما تقصد ؟
معلش انا اسف مش هعمل كده تاني ، متكبريش الموضوع بقي احنا فرحنا بعد بكره
انفعلت جدا من بروده و بجاحته و زعقت فيه و قلت أنا مش ممكن اتجوز واحد خاين و حقي..ر زيك
مسك وشي بكل قسوة و قال اتكلمي معايا بأدب انا يعتبر جوزك
قلت له انت مش جوزي و لا عمرك هتكون
قال روحي قولي الكلام ده ل ابوكي اللي صرف ملايين علي التجهيزات و الفرح اللي بعد يومين
قلت له بانفعال انت عارف انا هتجوز بس مش هتجوزك انت
مسك الطرحه اللي كانت في ايدي في ايدي و شباكها في شعري و عدلها علي وشي و رد عليا بمنتي السخرية و الاستهزاء هتتجوزي حد تاني في يومين ؟
قلت له بتحدي هتجوز في دقيقتين
و طلعت جري علي الشارع اللي قدام الاوتيل انا عندي استعداد اتجوز اي حد غير الخاين ده
لقيت واحد معدي شايل قفص فاكهه وقفته و قلت له انت متجوز رد عليا بسرعه و قال اعزب و معنديش عيال
قلت له تتجوزني و تاخد ٢٥٠ الف جنيه يكونوا معاك بمجرد كتب الكتاب
قال لي بابتسامه اولا انا اسمي كريم و حط قفص الفاكهة علي الأرض و مد أيده سلم عليا و قال موافق
لسه هتكلم لقيت حد بيشدني من ايدي بعنف ببص لقيته عماد
كريم اتحرك بسرعه و مسك أيده بعدها عني و قال له ارفع ايدك عن مراتي المستقبليه
عماد / الله و كمان هتتجوزي شيال من الشارع
انا / ملكش دعوة
عماد مسكني من ايدي بالراحه و قال العقلي يا سوزان و تعالي نتفاهم قلت له مش هروح معاك اتنرفز جدا و لسه هياخدني بالغصب كريم بص له بتهديد و قال له متجبرنيش اضربك
انا بقالي سنتين مخطوبه ل عماد عمره ما عمل عشاني موقف زي ده و لا عمري حسيت معاه بالأمان و الشخص اللي لسه اول مره اشوفه حسيت معاه بالأمان و الاطمئنان في ثواني
و اخدني كريم و مشينا ، عماد هددني و قال انا رايح لابوكي و هنشوف رأيه ايه في اللي انتي بتعمليه ده بس انا مهمنيش تهديد عماد خالص
و احنا ماشيين لقينا واحد فارش عالرصيف بيبيع اكسسوارات جبنا خاتمين بلاستيك و لبسناهم و طلعنا علي مكتب اقرب مأذون و اتجوزنا
روحت علي البيت و قلت ل كريم معلش ادخل معايا عشان تساعدني اشيل هدومي قبل ما عماد يعمل لي مشكله مع ابويا و معرفش اجي البيت اخد هدوم
دخلنا البيت بس للاسف لقينا ابويا و امي و عماد قاعدين و بيشربوا الشاي
عماد قال شايف يا عمي ، بنتك جابت لنا الشيال لغاية هنا و بعد شويه هتطلب منك أنها تتجوزه
انا قلت لا انا مش هطلب اتجوزه ، لأن انا اتجوزته فعلا
ماما اتنفضت و وقفت و قالت ايه ؟
قلت لهم انا مستحيل اتجوز واحد خاين
ابويا قال بكل حزم و بشكل نهائي انتي هتتطلقي و هتتجوزي عماد و انت يا استاذ شوف طلباتك ايه و انا تحت امرك
انا قلت لا يا بابا انا مش هتجوز الخاين ده ازاي تقول كده بعد ما عرفت عملته السوده
بابا : و عملتك انتي ايه ؟ بيضا ؟ الكلام انتهي خلاص ، مش ناقصين فضايح ده انا صارف ملايين علي فرحك و جوازك
انا : انتوا مبتفكروش غير في الفلوس ؟ محدش فكر في مشاعري
ماما : احنا بنفكر في مستقبلك
انا : و مستقبلي مش مع الخاين ده و قراري نهائي
بابا : ماشي يا سوزان ، بس مفيش و لا مليم تاني شوفي هتعيشي ازاي و هتباتي فين و لا حتي هتعرفي تجيبي ساندوتش تاكليه
انا فكرت و قلت اعمل ايه يا ربي و اروح فين ، و كمان انا وعدت كريم ادي له فلوس مقابل أنه اتجوزني و بدأت ابكي غصب عني
عماد بص ل كريم و قال له اعتقد انك المفروض تمشي
كريم بص له بتهديد و قال انا ساكت من ساعتها احتراما لوالد سوزان و والدتها و سايبهم يتكلموا مع بنتهم براحتهم لكن أنا أقدر اتكفل بزوجتي و مش هخليها تحتاج ل حد
كريم قرب مني و حط أيده علي كتفي بحنيه و قال متخافيش يالله بينا
و خرجت معاه و انا مش عارفه هنعمل ايه و لا هنروح فين و اخدني وداني علي مكان زي بلكونه كبيرة فيها اقفاص فاكهه كتير و كراسي
و قعدنا علي كرسي فيهم و قال متخافيش قلت له احنا هنعمل ايه؟ لو بس كان عندنا سرير ننام عليه و لا مكان نرتاح فيه قال لي تعرفي احنا لو بس شلنا الاقفاص دي ؟ بالفلوس اللي هتيجي ممكن يكفوا أننا نبات في بنسيون و نفطر كمان
شمرت ايدي و قمت و قلت طب ياللا بينا ، كريم ضحك و جه مسك ايدي و قال انا مستحيل هخليكي تشيلي حاجه كده ايديكي الرقيقه الحلوة اتعملت عشان تلبس الدهب و الماس مش عشان تشيل
و جاب خوخة جميله و بص لها و قال الخوخة دي تشبهك لونها جميل و ناعمه و مسكره لكن جواها صلب
و اداهالي و قال اقعدي ارتاحي كلي الخوخة دي و متشيليش هم حاجه ابدا ، انتي بدأتي طريق الحريه و انك تخرجي من تحت سيطرة الشخص السئ ده سواء قررتي تكملي معايا أو لا اوعي ترجعي للشخص الحقير ده ، انتي تستاهلي اللي يحبك بكل اخلاص و يقدرك
بصيت ل كريم و حسيت اني ممكن احب الراجل ده بكل سهوله انسان مخلص و شهم و يعتمد عليه ، راجل بمعني الكلمه ، الناس بيتقاسوا بالمواقف مش بطول المدة اللي عرفناهم فيها ، ناس كتير نعرفهم من زمان و همه في منتهي النداله و ناس تانيه بتبقي لسه عارفينهم و بيكونوا مستعدين يعملوا اي حاجه عشان يسعدونا
كريم ابتسم لي و قال هكون اسعد انسان لو فضلتي معايا بس في الاول لازم اروح مشوار
قلت له فين
قال مشوار مهم و شويه صغيرين و راجع و جاب شال صوف ناعم و حطه علي كتفي و قال استنيني انا مش هتأخر و متقلقيش ابدا من اي حاجه
خفت و قلت له هتروح فين بس قال لي مشوار صغير خالص مش هتأخر
بس كريم اتأخر و انا بدأت اتوتر هو راح فين ؟ قمت و اتحركت في المكان و رجعت قعدت تاني و مش عارفه اعمل ايه
حطيت راسي علي ايدي و غمضت عنيا و فضلت كده شويه لغاية ما سمعت صوت انا عارفاه كويس بيقول
ايه مشي و سابك هنا
طلع عماد دور عليا لغاية ما وصل لي أو يمكن خرج ورانا و كان بيراقبنا رديت و قلت له و انا فعلا مش طايقه ابص في وشه
ملكش دعوة
طب قومي معايا صدقيني هو مش راجع
مش هروح معاك اي مكان و ملكش دعوه بيا
صدقيني يا سوزي انا خايف عليكي ، تعالي طيب روحي بيت أهلك اللي قلقانين عليكي و بعدين خلاص بقي انا غلطت و انتي عاقبتيني خالصين قومي عشان خاطري
و مد لي أيده عشان اقوم معاه بس انا تجاهلت أيده و قمت عشان اروح بيت اهلي
نزلنا لقيت عربيته و ببص فيها لقيت مايسه راكبه في الكرسي اللي جنبه و هو بيشاور لي اركب ورا
اتصدمت من بجاحتهم و قلت له هي بتعمل ايه معاك
قال لي كان عندنا شوية حاجات بنخلصها
انا قلت في نفسي الندل ده عمره ما هيتغير و افتكرت كلام كريم لما قال انتي بدأتي طريقك ناحية الكرامة و الحريه و اوعي ترجعي تاني
قلت له بصوت عالي انا مش جايه معاك ، لقيته جاي ناحيتي بعصبيه و قال انا زهقت من دلعك ده و مسك ايدي و شدني ، و يا دوب لسه متحركش خطوة لقينا حد ضربه في وشه
و صوت كريم بيقول انا مش قلت لك متحطش ايدك علي مراتي تاني
بصيت بفرحه و بدموع في نفس الوقت و قلت له انت كنت فين لقيته طلع علبة صغيرة من جيبه و فتحها و قال انا اسف عالتأخير لفيت الدنيا عشان الاقي حاجه مناسبه
بصيت في العلبه لقيت خاتم جميل فيه حجر الماظ صغير
قلت له ايه ده يا كريم انت جبته منين
رد عماد من بعيد و قال اكيد سرقه ، هو الشيال هيجيب حاجه زي دي منين
كريم مبصش ل عماد اصلا و لا رد عليه بص لي انا بابتسامه و قال انا مش شيال انا صاحب المطعم اللي وراكي ده و في عندنا فرعين تاني كمان و الفاكهه اللي فوق دي انا يختارها بعمليه لأن انا اللي بعمل التحليه بنفسي هدوقهالك مره و مش هتصدقي حلاوتها
ضحكت و قلت له بجد 😳
قال بجد و الله , تلبسي الخاتم بقه ؟
مديت له ايدي و انا مبتسمه و لمحت بطرف عيني عماد و هو هيطق من الغيظ و مايسه بتحاول تهديه و هو بيبص لها بكل ضيق و اشمئزاز
و حطيت ايدي في ايد جوزي و مشينا و انا طايرة من السعادة مش مصدقه أن الكابوس اللي كنت فيه خلص و صحيت منه علي حقيقه جميله مع انسان طيب و مخلص و شاريني
تمت..
اقرأ ايضا قصتنا الجميلة نص القلب