قصص و روايات
قصة رحيم
قصة من اروع ما كتبت اتموا قراءتها للنهاية لانها بحق قصة ممتعة جدا انتظر تعليقاتكم بعد قراءة قصة العم رحيم و يمكنكم متابعة المدونة لقراءة اجمل قصص و روايات
 |
| قصص و روايات |
قصص و روايات
لو سمحت ، مش ده المكان اللي فيه عيادة دكتور نبيل ؟
دكتور نبيل مين ؟ مفيش دكاترة هنا اصلا
انا اسمي زينب عندي ٢٥ سنه ، والدي و والدتي توفوا من و انا صغيرة جدا تقريبا كان عندي ٦ سنين و تم إيداعي في دار ايتام ، و كبرت في الدار و بعد ما اتميت تعليمي خرجت من الدار و اخدت شقه صغيره جدا ايجار و قعدت فيها و شغاله في محل بقالة و مرتبي بيكفي مصاريفي و الايجار الحمد لله و بحوش منه مبلغ كل شهر
من سنتين تقريبا عنيا وجعتني فجأة و لفيت علي كل الدكاترة و بردو محدش قدر ينقذ نظري
للاسف في اقل من ٦ شهور فقدت البصر و بقيت كفيفة
و قعدت فترة لغاية ما اتعودت علي الوضع الجديد
لكن الدكاترة كلهم أكدوا لي أن في عمليه ممكن استعيد بها نظري ، المشكله ان العمليه دي تكلفتها كبيرة جدا عليا
من يومها و انا بحاول اشتغل اي حاجه و بوصل الليل بالنهار عشان اجمع المبلغ المطلوب للعملية صليت كتير و دعيت ربنا و انتظرت الفرج من الله سبحانه و تعالى
لغاية ما الحج عبد الرحمن صاحب المحل اللي انا شغاله فيه لقي اعلان على النت عن عيادة دكتور نبيل مدكور - دكتور عيون شاطر جدا و بيساعد المحتاجين و بيعمل العمليات بنص التمن تقريبا
قلت يا فرج الله ، و كلمت الرقم الموجود في الاعلان في ساعتها ، رد عليا الدكتور بنفسه و قال لي ابعتيلي علي واتساب كل الفحوصات اللي انتي عملتيها لعنيكي و حتى روشتات الدكاترة صوريها لي عشان اقدر أقيم الحالة
فعلا بعت له كل حاجه و هو بشرني و قال لي اطمني في اقرب وقت هتبقي بتشوفي تاني ، و العملية بنص التكلفة
قلت له ربنا يبارك لك
اداني عنوان العيادة علي أطراف البلد خالص و الحته اللي فيها العياده فاضية ، قلت له بس المكان ده بعيد مش في وسط البلد و لا في مكان فيه عمار
قال لي انا مقدرش علي ايجار العيادات في وسط البلد خصوصا أن انا مباخدش مقابل ، انا فاتح عبادتي للناس الغلابه و سألني مين هييجي معايا ؟ و قال إن المفروض اجي لوحدي لأن غرف الاقامه في عيادته زحمه و مش مسموح غير بإقامة المريض مفيش مكان ل حد من أهله
قلت له تمام انا اصلا مليش أهل
قال تمام جدا ، هستناكي بكره الساعه ٤ العصر متتأخريش و تجيبي معاكي المبلغ كامل لأن انا عليا التزامات و مصاريف
قلت مفيش مشكله ، حتي الفلوس مكانتش موجوده معايا كلها و اضطربت استلف من صاحب الشغل مرتب ٣ شهور مقدم
ركبت مواصلة و نزلت في المكان اللي هو قال لي عليه ، و فردت عصايتي و بدأت امشي في الشارع هو اداني علامة قال لي هتنزلي تلاقي سور كبير من بعده ادخلي يمين و هتلاقي العيادة تالت مبني بعد السور
فضلت ادور و مش عارفه اوصل بردو
طلعت تليفوني و حاولت اتصل بس مفيش شبكه خالص ، سمعت صوت شخص رجليه بتخبط ع الأرض بسرعه واضح أنه بيجري
اول ما حسيت إنه قريب مني ناديت بصوت عالي و قلت
لو سمحت ، مش ده المكان اللي فيه عيادة دكتور نبيل ؟
دكتور نبيل مين ؟ مفيش دكاترة هنا اصلا
مسكت التليفون و فضلت اتصل تاني بالرقم لغاية ما رد و فضل معايا ع التليفون لغاية ما وصلت
طلعت ٤ سلالم و دخلت المبني اخدني من ايدي و قال لي هنروح مكتب الحسابات نخلص إجراءات الدفع و بعدين ناخدك علي غرفة إقامة فوق
جاب لي كرسي و قالي اتفضلي اقعدي و قعدت و اخد مني الفلوس و قال انتظريني 10 دقايق
و فضلت قاعده و حسيت إنه عدي وقت كتير و مش سامعه صوته ، ناديت اكتر من مره بس محدش رد و المكان حواليا هادي اكتر من العادي
قلت استني شويه كمان ، لمست ساعتي لقيت الساعه بقت 4و نص
فضلت مستنيه كتير و ناديت كتير بس محدش جه و لا رد عليا
لمست ساعة ايدي تاني لقيتها 5 و 10 دقايق
فردت عصايتي وقمت اتحرك و انادي عليه و حاولت اخرج من المكان
بعد كام دقيقه حسيت أني علي باب المبني لأن الهوا كان بييجي من كل اتجاه
ناديت تاني ، بس المره دي رد عليا صوت مختلف ، صوت راجل كبير
قال ضحية جديدة ؟
قلت له نعم ؟ مش فاهمه ؟
قال لي تعالي يا بنتي مفيش حد هنا و ساعدني انزل السلم
قلت له هو مش دي عياده ؟
قال عيادة ايه ؟ دي خرابه ..
يعني نبيل ده مش دكتور
لا مش دكتور و معرفش اصلا اسمه نبيل و لا لا ده راجل خطر جدا لدرجة أنه هددني لو شافني أو عرف اني باجي هنا هيقتلني ، ده مجرم و الحمدلله أنه خد الفلوس و سابك معملكيش حاجه متزعليش
اومال انت بتعمل ايه هنا
انا علي باب الله ، من ١٠ سنين حصل لي أزمة كبيرة خسرت فيها بيتي ، من وقتها و انا باجي انام هنا في الخرابه دي ،
طب و بتعيش ازاي
اهي ماشيه ربنا مبينساش حد ، متزعليش نفسك يا بنتي عالاقل انتي عندك بيت
بيت ايه يا عم ، انا معنديش بيت و مليش أهل و الفلوس اللي خدها النصاب ده كل ما املك من الحياه و مستلفه كمان و كان عندي امل اني لما اعمل العمليه و اشوف هقدر اشتغل و اجمع فلوس تاني بس انا بقيت في الشارع دلوقتي
حسيت أن الراجل اتأثر جدا و فضل ساكت شويه و بعدين اتكلم
تعرفي يا بنتي انا بشتغل فترة الصبح في تجميع القمامة وأولاد الحلال بيساعدوني و كان كل حلمي يبقالي بيت زي زمان و كنت بحط القرش علي القرش من ١٠ سنين عشان يكون لي بيت
و كمل كلامه بضحكه بس بعد ما جمعت مبلغ كويس بقيت مش هاين عليا اصرفه هو انا يعني هعيش كام سنه تاني
خدي الفلوس يا بنتي انتي محتاجالهم اكتر منى بكتير
اتصدمت من عرض الراجل الطيب ده و فكرت في رحمة ربنا حقيقي ربنا مبيقفلش بابه ابدا ، بس صعبان عليا الراجل الغلبان و ازاي عرض عليا كل اللي بيملكه و هو ميعرفنيش
اترددت و في النهاية رفضت
بس هو أصر و قال لي الفلوس دي بتاعتك انا كنت بجمعها عشانك ، الفلوس دي كانت هتتصرف و اتحط قدامي كذا بيت صغير و مناسب و دايما كان بيحصل حاجه توقف الموضوع
انا كنت بستغرب و بقول ايه الفلوس اللي مش عايزة تتصرف دي و بقيت متمسك بيها اكتر و مكنتش فاهم ليه ، و دلوقتي بس فهمت ، انتي ربنا بعتك ليا عشان هو ده المكان اللي المفروض فلوسي تتحط فيه
و بعدين مسمعتش صوته بس كنت سامعه صوت مشيته و بعد ٥ دقايق لقيته بيحط في ايدي كيس مربوط و قال
خديهم يا بنتي و فرحي قلبي و سمعته بيهمس و بيقول يا رب انا عايز بيت في الجنه
قلت له انت اسمك ايه يا عم
قال انا اسمي رحيم و انتي اسمك ايه
قلت له اسم علي مسمي يا عم رحيم ، انا اسمي زينب
قال عاشت الاسامي ، تعالي بقي أما اوصلك الشارع و اركبك مواصله ترجعك بيتك
رجعت البيت و انا مش مصدقه أن الدنيا لسه فيها ناس زي عم رحيم و نويت اني هرجع له تاني
بعد ما حكيت للحج عبد الرحمن عن اللي حصل لي قال انا اسف يا زينب مكنتش أتخيل أن الدكتور ده نصاب سامحيني
قلت له يا حج و انت ذنبك ايه
المهم دلوقتي نعمل العمليه و بدأنا إجراءات حجز المستشفي و اخترنا دكتور شاطر و رحنا و اتفاجأت أن عم رحيم مديني فلوس تزيد عن تكلفة العملية
دعيت له كتير جدا و دخلت غرفة العمليات و طلعت منها و انا عنيا ملفوفة ب شاش و الدكتور قال هنفك الأربطة دي بعد اسبوع
فعلا رحت للدكتور و فكينا الرباط و بدأت الدنيا تنور تاني شويه شويه
ياااااااافرج الله انا رجعت اشوف تاني ، اللهم لك الحمد والشكر فضلت ادعي كتير ل عم رحيم
و اول ما بقيت كويسه رحت علي طول علي قسم الشرطة بلغت عن النصاب و اكتشفت أن في اكتر من بلاغ متقدم ضده و في كل مره بيقدر يهرب لانه ذكي جدا لدرجة أن مدير الأمن بنفسه متابع الموضوع ده و بردو مش قادرين يوصلوا ل حاجه
طلبت اقابل مدير الأمن
و قلت له انا هساعدكم تقبضوا علي النصاب ده بس ليا التماس عند سيادتك
قال خير
حكيت له حكاية عم رحيم و طلبت منه أنه يساعده ياخد شقه من شقق المحافظة
مدير الأمن في ساعتها كلم مسئول الاسكان في المحافظة و شرح له الوضع و طلب منه ينقل الصورة للمحافظ
في الوقت ده انا بدأت ارسم خطتي عشان أوقع النصاب ده في شر أعماله
المشكله أنه شال الاعلان و رقمه اللي كان معايا لقيته مرفوع من الخدمه
ميأستش و فضلت ادور كل يوم عالنت
و بعدها ب تقريبا ٦ شهور تقريبا لقيت إعلانه ب اسم جديد و رقم تليفون جديد بس طبعا نفس المكان ، فرحت جدا
اتصلت و طبعا رد عليا و اداني ميعاد و قال لي تيجي لوحدك عشان العيادة مفيهاش مكان و غرف الاقامه للمرضي بس
ابتسمت و قلت له امرك يا دكتور
قفلت معاه و كلمت مأمور القسم و رتبت معاهم
و في الميعاد لبست نضارتي السودا و اخدت عصايتي و رحت ، دخلت المكان بمساعدة العصابه و مع اني شفته بس فضلت ساكته لغاية ما هو اتكلم
قال لي سلامتك اتفضلي هنروح الحسابات بس نخلص الإجراءات الورقيه و اطلعك اوضتك
قلت له طبعا احنا بيننا حسابات و لازم تخلص بس في ضيوف معايا همه اللي هيخلصوها و قلعت النضاره و قلت اتفضلوا يا جماعه
فجأة لقي نفسه متحاوط ب ييجي ١٥ عسكري و ظابط و ملحقش حتي يتكلم
و قالوا لي تعالي هنوصلك قلت لهم لا انا هستني عم رحيم
و طلعت فعلا دورت في المكان لقيت انبوبه صغيرة و معاها بوتاجاز ارضي و كراتين فيها هدوم و حلتين و شوية اطباق وحاجات عم رحيم كلها مركونة جنب الحيط ، عرفت أن ده مكانه
قعدت استناه و اول ما وصل و شافني ضحك لي اجمل ضحكه شفتها في حياتي و قال حمدالله علي سلامتك يا بنتي
حسيت فعلا أن ابويا اللي بيكلمني قلت له بص بقي يا عم رحيم انت هتيجي معايا
قال لي هاجي معاكي فين ؟ قلت له تعالي بس من غير كلام ، هو انت خايف مني
ضحك و قال لي لا طبعا
اخدته و طلعنا علي مبني الحي ، و هو مستغرب جدا و طلعت مفتاح من شنطتي و فتحت استراحة الحارس
و قلت له دي شغلانتك و ده مكانك يا عم رحيم من دلوقتي
بص لي باستغراب و تساؤل
قلت له انا ساعدت الشرطه تقبض علي النصاب ، عم رحيم برق عنيه و مش مصدق أن كل ده يطلع مني
قلت له استني المفاجأة لسه مجتش
في المقابل انا قابلت مدير الأمن و طلبت توفير سكن ليك
و بعد اللف و المكالمات و الالتماسات سكرتير المحافظ قال احنا محتاجين غفير ل مبني الحي
و بالتالي انت دلوقتي موظف ليك راتب شهري و هتقعد في الاستراحه الجميله دي
عم رحيم مكانش مصدق نفسه قلت له غمض عنيك و ادخل و بعدين فتح عنيك
عم رحيم كان مذهول من جمالها و نضافتها ميعرفش انى عملت كل اللى اقدر عليه لغاية ما خليتها تليق بيه
قلت له انا نضفتها و رتبتها و حطيت لك اكل في التلاجه و لو احتجت اي حاجه كلمني
عم رحيم كان زي ما يكون فقد النطق
ابتسمت و قلت له و في هديه كمان مني
دولابك هتلاقي فيه هدوم ارجوك يا عم مترجعش الخرابه تاني
اخيرا اتكلم و قال يا بنتي ده كتير اوي كتر خيرك
قلت له انت تستاهل اكتر من كده و انا مهما عملت عمري ما هوفيك حقك يا طيب ، انت عوضتني عن اهلي ربنا ما يحرمني منك و قلت له اني هاجي أزوره و اتطمن عليه علي طول
خرجت من عند عم رحيم و انا مقتنعه تماما أن الاستثمار الحقيقي هو الاستثمار مع الله
و كنت سامعه صوت من جوايا بيقول الآية الكريمة
(( إِن الٓذين يتلون كتاب الله وأقاموا الصلاة وأنفقوا مما رزقناهم سرا و علانية يرجون تجارة لن تبور )) صدق الله العظيم
تمت
لا تفوتكم قراءة قصص و روايات اخري من مدونتنا
و لا يفوتكم ما حدث في الساحل الشمالى
اترككم مع قصة الساحل الشمالى