قصة وعبرة زوجتى و المدير

عشان فريدة الجزء الثانى

قصة قصيرة

المشكله اني مش عارف اتكلم مع فريدة خالص ده انا بسلم عليها بالعافيه و هي مكشره في وشي مش عارف ليه

انا لازم اخد موقف و هي مروحه النهارده

• مساء الخير يا بشمهندسه فريدة 😊

• مساء النور😶

• مبقيتيش تقفي تسلمي انا مزعلك في حاجه🤔

• لا عادي😐

• ارجوكي قولي لي فيه ايه

• مفيش اي حاجه

• طب ممكن تتفضلي تشربي حاجه

• لا ،

• عشان خاطري

• لا شكرا

• ما انا مش هسيبك تمشي يا تقعدي تشربي معايا الشاي يا اما تقولي فيكي ايه 

• مفيش حاجه يا استاذ حماده

• انا مش استاذ

• خلاص تمام ممكن امشي

• لا ، ارجوكي متمشيش و انتي زعلانه و ارجوكي متزعليش مني

• انت مهتم اوي كده ليه

• ده اهم حاجه في حياتي زعلك ، و مقدرش عليه ابدا طب ممكن تيجي اوريكي حاجه

• خير

• بصي ( انا كنت بجيب لها شيكولاته كل يوم )

• ايه ده 

• دول ٦ شيكولاته عن ال ٦ ايام اللي مكنتيش بتقفي تسلمي فيهم كل يوم كنت بجيب واحده

• كل يوم

• و هفضل اجيب علي طول ……. ، يااااااااه اخيرا ابتسمتي اخيرا الدنيا نورت

• للدرجه دي ؟؟

• و اكتر بكتير ، و حياة عربيتك يا شيخه ما تزعلي مني

• هههههههههههه

• خلاص بعد الضحكه الجميله دي صافي يا لبن

• صافي يا لبن

• اسمها حليب يا قشطه ، بس قشطه 😁😁

• طيب انا همشي بقا

• شرفتينا و نورتينا 

اخر النهار طلبت اقابل عمرو و اول ما جه قابلته بسرعه و قلت له يعني عايزني اعمل ايه عشان تجوزني اختك

• مش انت طالبني عشان الشغل

• لا

• و بعدين معاك يا احمد انت داخل في شهر و انت في الكليه و معملتش حاجه غير انك كل ما تشوفني أو تكلمني في التليفون تطلب ايد فريدة انت رايح تشتغل و لا رايح تهزر

• يا باشا مش فريدة دي اختك

• اه

• و انا صاحبك حبيبك

• اااه

• طيب ايه الأهم ؟ الشغل و لا جواز اختك و صاحبك

• يا دي الليله , تحب نبعت ظابط تاني بدالك

• لا

• طب اخلص ، ممكن بقا تكلمني شويه عن الشغل

• البنت اللي حكيت لك عنها كانت عندي في الجراج النهارده هي و شلتها و فهمت منهم انهم كلهم بيذاكروا من مذكرات بيجيبوها من مكتبه قدام الجامعه اسمها مكتبة الجامعة

• يبقي مش همه اللي بيشتروا الامتحانات

• لا انا متأكد أنهم همه لأنهم قالولي الملخصات دي بييجي منها الامتحان بالظبط

• و متعرفش مين اللي بيعمل الملخصات دي

• لا

• طب تعرف لنا بسرعه

• حاضر

• اتفضل بقا عشان عندي شغل😬

• ماشي يا عم ليك حق تتأمر و الله ل اخلي الواد ميقولكش يا خالي😋

• امشي يا احمد 😡

مشيت بس متطمن  ، عمرو موافق عليا و فريدة راضيه عني و الدنيا مش سايعاني

تاني يوم استنيت كارما و صحابها و كنت مجهز لهم فطار علي حسابي و احنا بنفطر جت فريدة قمت بسرعه رحت لها ساعدتها تركن و سلمت عليها و اتمنيت لها يوم سعيد بس هي بصت عالطلبة اللي قاعدين فأنا تلقائيا قلت ارجوكي متفهميش غلط 

• و لا غلط و لا صح عادي انا مالى

• بالله عليكي متزعليش تاني

• مش زعلانه و لا حاجه انا بس مستغربه

• بكره تفهمي كل حاجه ، ممكن متفكريش في حاجه و تروحي تخلصي شغلك

• ماشي مش هفكر في حاجه

• بس انا هفكر فيكي ❤️

• 😊😊

• روحي بالله ربنا معاكي

• سلام

• سلام

رجعت قعدت مع الشباب و استغربوا اني بسأل تاني عن موضوع الملخصات

• انت مهتم اوي بالموضوع ده

• اقولكوا سر بس اوعوا تقولوه لحد

• اكيد

• وعد

• طبعا وعد متقلقش

• انا بفكر ابدأ اعمل ملخصات اهو يبقي باب رزق ليا انتوا عارفين انا شاطر و اقدر انافس اي حد بيعمل ملخصات

• لا يا فالح مش هتقدر تنافس لأن اللي بيعمل الملخصات واحد من اوائل الدفعه و مامته هي صاحبة المكتبه فأنت مستحيل تنافسهم 

• اااه عشان كده ، طيب كلوا كملوا فطاركو

خيط مهم اهه الحمد لله بس انا محتاج اعرف الولد ده ، 

اخر النهار كارما بتنزل لوحدها تاخد عربيتها وقتها هطلب منها تعرفني عليه و أما يمشوا هكلم عمرو اعرفه بالتطورات دي

اخر النهار جت كارما فعلا و قلت لها اني عايزها في موضوع

• موضوع ايه 

• كنت عايز اطلب منك طلب

• اتفضل ، مالك مكسوف ليه جمد قلبك

• مش مكسوف ( هي واقفه لازقه فيا اصلا بمكياجها و برفانها و هدومها العجيبه بس يالله هستحمل عشان اخلص ) انا عايز اتعرف علي الولد الشاطر اللي بيعمل الملخصات 

• بسيطه اعرفك عليه

• امتي

•  بكره الصبح يبقي بيفطر معانا 

• تمام

• انت تؤمر يا …

و رسمت لي قلب في الهوا 😳🙄. ما علينا المهم نخلص من المأموريه دي 

و بعد ما هي مشيت بشوية نزلت فريده و اديت لها الشيكولاته بتاعتها

• هو كل يوم شيكولاته

• اه كل يوم ، اقولك سر

• قول 

• انا بجيب الشيكولاته و انا مروح و تفضل معايا لتاني يوم بحطها في التلاجه و ابص عليها كل ما احس انك وحشاني

• يا سلام

• اه و الله ، المشكله ان التلاجه هتبوظ

• ليه

• لاني فاتحها طول الوقت ابص علي الشيكولاته عشان انتي علي طول وحشاني

• ……..

• حتي سكوتك جميل و كلامك جميل ، ابتسامتك جميله و كسوفك اجمل

• طيب امشي انا بقا 👋👋

• هتاخدي قلبي معاكي ❤.

 انا فريدة 😊😊

ايه الكلام الجميل و الرقيق ده انا مش هضحك علي نفسي اكتر من كده انا فعلا اتعلقت ب حماده و متأكده أنه إنسان متربي و ابن ناس و عمر الشغل ما كان عيب طالما شغل حلال و بعدين واضح ان هو مثقف و كمان  جامعي يعني ممكن يلاقي فرصة شغل احسن إن شاء الله ، الأهم اني بكون مبسوطه و مرتاحه لما بشوفه أو لما بكون معاه ☺️.

روحت البيت لقيت ماما و عمرو قاعدين و بيتكلموا و لما شافوني بصوا لي بابتسامه همه الاتنين و ماما قالت

• كبرتي يا فريدة

• اه يا ماما كبرت من زمان على فكره ، مش فجأه يعني النهارده

• عمرو : و الله ما هتكبر ابدا هتفضل عيله

• انا : كبرت غصب عنك ( طلعت له لساني و ضحكت )

• عمرو : اهه مجبتش حاجه من عندي ،  هبله !

• انا : طب هتغدونا ايه النهارده و لا مش هنتغدي

• عمرو : ما تدخلي انتي تعملي اكل و تغدينا كلنا مش انتي كبيرة  

• ماما : خلاص بطلوا شغل ناقر و نقير ، روحي غيري هدومك و تعالي ساعديني نحضر الاكل ، و انت قوم جهز السفرة و شيل الاطباق ، ما انت هتتجوز بردو ف يوم و لا عايز عروستك تقول عليا اني طلعتك كسلان و بروطه

• بروطه ؟! انا بروطه يا ماما ؟ ده انا بعون الله اطبخ اجدع منك و من بنتك و من العروسه اللي هتجوزها😎

• لا و النبي ؟

• اومال انتي فاكره ايه

• طب قول لي و النبي يا ابني العريس اللي متقدم لأختك ده ، جدع ابن حلال

• بصي يا ماما باختصار انا لو ينفع كنت رحت خطبته ليها لانه حقيقي متربي و ابن ناس طيبين و متمناش ليها غيره

• الحمد لله ربنا يعوض صبرى 

• طب بس متكلميهاش في الموضوع ده دلوقتي استني لما اقولك

• ليه بس

• معلش يا ماما دي حاجه في الشغل ، اوعي يا ماما تكلميها الا لما اقول لك متخلينيش اندم بقا اني استعجلت و حكيت لك

• خلاص خلاص مش هكلمها ، يالله بقا ناكل 😊 .

اتغدينا و قمت غسلت اطباق الغدا علي بال ما عمرو عمل الشاي و قعدنا شربنا الشاي و اتكلمنا شويه و دخلت اوضتي اخلص حاجات طالبها مني الدكتور محمود المشرف علي رسالة الماجستير بتاعتي 

، محسيتش بالوقت غير لما جعت ببص للساعه لقيتها ١٠ مساءا ! الوقت عدي بسرعه جدا و انا لسه مخلصتش ، قمت عملت لي ساندوتش جبنه و كوباية شاي بلبن و رجعت علي اوضتي تاني اكمل 

نمت متأخر و صحيت الصبح مرهقه و مزاجي مش حلو بسبب قلة النوم بس لازم اقوم و فعلا لبست بسرعه و نزلت ، حاسه اني لما اشوف حماده مزاجي هيتعدل  ( مش لايق عليه اسم حماده ، ده طول الباب ، حماده ازاي يعني ؟ ) 

دخلت الكليه و ركنت عربيتي في الجراچ بس مش شايفاه ، فضلت أتلفت حواليا و سامعه صوت جاي من عند عربيه صغيرة كده تقريبا عربية واحده من الطلبه اللي بييجوا يقعدوا عنده ، مشيت شويه عشان اشوف هو هناك و لا لا

 😳 الاستاذ قاعد علي كرسي و البنت قاعده علي كرسي جنبه بالظبط  و بيهزروا و ضحكهم عالي جدا و كل ما تضحك تخبط علي أيده ، ايه ده ؟ ايه القرف و التهريج ده ؟ 😳😳

همه مكانوش شايفيني رجعت خطوتين ل ورا و التفت ناحية مبني الكليه و طلعت بسرعه ، انا ايه اللي عملته في نفسي ؟ واضح ان انا كنت غلطانه في حكمي عليه و في مشاعري ناحيته انا فعلا هبله زي ما اخويا قال ،

 انا لازم اوقف الشخص ده عند حده و لازم اركز في مذاكرتي بلاش كلام فاضي ، بس حاسه بوجع رهيبيييب 😢😢

اليوم خلص معرفش ازاي انا اصلا مش مركزة و دموعي حبساها بالعافيه ، مستنيه اليوم الرخم ده يخلص و اروح عشان ادخل اوضتي و اقفل عليا الباب و اعيط و انام .

@@انا احمد 😊😊

كارما كانت عندي الصبح و طبعا مضطر اتعامل معاها كويس جدا لغاية ما اوصل للولد اللي بيعمل الملخصات المشبوهه ، 

في نفس الوقت كلفت الأمين ابراهيم ( اللي فاتح بوفيه جوه الكليه في دور المدرجات ) يعمل تحري عن الطالب اللي مامته صاحبة مكتبة الجامعه و يعمل تحريات عن الست ذات نفسها .

قعدت مع كارما شويه الصبح و فضلت تحكيلي حكايات تافهه و انا لازم اضحك و المشكله أنها علي بال ما مشيت ببص لقيت عربية فريدة موجوده و مقفوله ، يعني فريدة دخلت الكليه من غير ما تصبح عليا 🙁

انا عايز اخلص المأمورية دي بقا

في اخر اليوم لقيتها نازله بسرعه و مش بتبص ناحيتي و لا بتدور عليا زي كل يوم حتي مبترفعش عينيها و راحت بسرعه علي عربيتها ركبتها و هي لسه هتطلع بيها و انا رايح ناحيتها بسرعه رفعت عينها و بصت لي و طلعت بعربيتها بسرعه

 نظرة عنيهاوجعتني جدا مع اني مش قادر افسرها بس هي لوم علي اتهام علي الم علي عتاب ، مش قادر احدد و قبل ما الحق اخد اي رد فعل كانت مشيت

انا هموووت

المشكله أننا في اخر الاسبوع كل مره الاسبوع كان بيخلص و هي راضيه كانت بتوحشني بس بكون مرتاح

الاسبوع ده هتوحشني و كمان مش مرتاح

اخر النهار هنتجمع كلنا انا و عمرو و الامناء و إن شاء الله يبقي في جديد ، انا بقيت متأكد أن اللغز كله عند الطالب و مامته ، 

لما وصلت المكان اللي بنتجمع فيه 

لقيت الأمين ابراهيم موجود و مفيش ٥ دقايق و الأمين وليد جه ( ده اللي كان عامل بوفيه في الدور اللي فيه مكاتب الدكاترة و المعيدين) و قعدنا نتناقش شويه كان عمرو جه

قعدنا بقا جمعنا كل معلوماتنا و رتبناها و وصلنا في الاخر أن لازم يتقبض علي الولد ده بدون شوشرة و يتحقق معاه و نواجهه بالمستندات و ازاي بيعمل الملخصات ميخرجش عنها جزء كبير من الامتحان

 و هنحقق مع أمه كمان لأنها بتبيع الورق ده في مكتبتها و غالبا زي ما احنا راسمين أمه لو عندها معلومه هتقولها لأنها هتخاف علي مستقبل ابنها و كل ده لازم يتم بسرعه ، 

بالفعل بالليل هنبعت نجيبه القسم بعد ما استئذنا النيابه و اطلعنا مأمور القسم علي كل اللي حصل و اللي كان رأيه أن التحرك لازم يكون سريع ، بالليل جبنا الولد 

 بعد التحقيق معاه و بعد ما خوفناه أنه كده مش هيكمل تعليم و هيفضل محبوس الولد اعترف أنه ملوش دعوة بمحتوي الملخصات و أن مامته بتجيب له ورق جاهز هو كل اللي عليه أنه يذاكره و يعيد تلخيصه بأسلوب طالب و يتبااع عندها في المكتبه بأسعار كبيرة طبعا ، 

جبنا الام و هددناها بابنها بس هي ست ذكيه و حريصه طلعت عنينا و بعد ما اتحجزوا همه الاتنين عندنا يوم و نص و بعد كل محاولاتنا أننا نوقعهم في الكلام ،  كملت الصورة 

الام ارمله من ١٢ سنه عندها ولد و بنت و عندها المكتبه دي و بحكم انها قدام الجامعه و بتتعامل مع الطلبه و الدكاترة و خصوصا بعد ابنها ما دخل الكليه بقت تروح له كل شويه تقعد مع الدكاترة بتوعه و في مرة قابلت دكتور اسلام المسئول عن كنترول الكليه 

 بعد مقابله و اتنين عجبته و اتجوزها في السر و عشان هي طماعه مكتفتش بالرزق اللي بييجي من المكتبه و استخدمت سلطة جوزها في أنها توصل لأجزاء كتير من الامتحانات و بقت تجيب الاسئله و الاجابات و تضيف عليها امتحان و لا اتنين من بتوع السنين اللي فاتت باجاباتهم  تديها ابنها و هو يعمل الملخصات دي و كل حاجه بسعر حسب أهميتها و حسب هي فيها اد ايه من الامتحان 

 العجيب أن الولد طلع فعلا ميعرفش حاجه ، أمه هي العقل المدبر و حتي ميعرفش أن أمه اتجوزت اصلا !! و المصيبه بقي أنها بتبيع الامتحان نفسه بعيدا عن الملخصات دي و ابنها بيذاكر من تلخيصه زيه زي الطلبه ، المفتريه بتبيع الامتحان لأولياء أمور طلبه معينين هي بتختارهم بنفسها و مبتديش الامتحان ابنها عشان ميتكشفش و يكشفها 

ست داهيه فعلا و دلوقتي خلاص احنا عملنا اللي علينا و بلغنا عميد الكلية بنتائج التحقيقات لانه هو اللي كان مقدم البلاغ و طلب مننا منحققش مع الدكتور اسلام ( جوز الست صاحبة المكتبه ) و لا نطلبه في قسم الشرطة و أنه هيتخذ ضده الإجراءات المطلوبة و كده دورنا احنا خلص و الأمور هتمشي بعد كده بالإجراءات القانونية 

بعد المجهود المرهق ده اخيرا هنروح بيوتنا نرتاح شويه بس قبل ما امشي اصريت اني اتكلم مع عمرو مع اننا كنا فعلا تعبانين انا و هو 

• عمرو

• نعم 

• مش خلاص دلوقتي المأمورية خلصت

• اه الحمد لله

• ممكن بقا تفاتح فريدة في موضوعنا

• ممكن ترحمني ، انا مش قادر أصلب طولي ، انت بتجيب طاقه منين 

• ما انا خايف تضيع مني و اندم العمر كله

• ايه الدراما اللي انت عايش فيها دي ، يا بني ما انا اخوها و لا انت مش واخد بالك ؟ يعني هي مش هتتجوز اكيد غير و انا موجود ,يبقي هتروح منك ازاي ، عارف ؟ انا زهقت منك ، انا ماشي و هكلمها حاضر ، اسكت بقا 

## انا فريدة 🙁

بعد نهاية اسبوع كئيبه و ممله و حتي عمرو مكانش موجود في البيت و انا مخنوقه و مقضياها نص الوقت نوم و النص التاني عياط ، انا مش عارفه مالي ، معقول انا حبيته للدرجه دي .

و لا ليا مزاج انزل الكلية و لا عايزة اشتغل و لا عايزة اشوف حد ، بس للاسف لازم انزل .

انا هركن العربيه و امشي بسرعه مش قادرة اشوفه ، و رغم اني عايزة امشي بسرعه مقدرتش امنع عيني تدور عليه بس بردو مش شايفاه و نزلت من العربيه و بصيت في كل حته مش شايفاه و حتي الترابيزة و الكرسي مش موجودين

هو راح فين ؟ انا عايزة اشوفه و لو من بعيد حتي

انا متلخبطه جدا ، طلعت الكليه بالعافيه و مش طايقه الهوا اللي بيعدي من قدام وشي و يا دوب وصلت المكتب لقيت نفسي مش قادرة اقعد ، طلبت إجازة ٣ ايام و سبت ورق الإجازة ل سمر صاحبتي تخلصهولي و نزلت بسرعه ركبت عربيتي و روحت ، طول الطريق عياط و بسرعه دخلت اوضتي و قفلت الباب 

عمرو في البيت لسه و شكله مش نازل النهارده كان بيقول أنه واخد راحه عشان كان بقاله ٣ ايام بييجي البيت ساعتين و يرجع الشغل تاني بس حتي عمرو مش قادرة اقعد اتكلم معاه و مش قادرة اتكلم مع حد ، بعد شويه لقيت الباب بيخبط و صوت ماما بتقول

• فريدة

• اتفضلي يا ماما

• مالك يا حبيبتي ؟

• مفيش يا ماما

• انتي بتخبي علي ماما ؟

• لا يا ماما صدقيني مفيش حاجه انا بس مضغوطه في الشغل و المناقشه قربت و حاسه اني خايفه و معملتش حاجه

• متقلقيش يا حبيبتي ربنا موجود و انتي شاطرة انا واثقه فيكي

• متشكره جدا يا ماما ، انا خدت إجازة ٣ ايام 

• منورة البيت يا حبيبتي و فطارك عليا النهارده

• متشكره جدا يا ماما ربنا يخليكي ليا

بعد شويه ماما دخلت بالقطار بس لقيته زياده شويه ، قالت لي عمرو بيغسل وشه و هييجي يفطر معاكي و انا هطلع رايحه اشوف خالتك و مش هتأخر ، قبل الغدا هبقي هنا قلت لها براحتك يا ماما و سلمي لي عليها

بعد شويه عمرو جه و قعد معايا و حاول بكل الطرق يضحكني كنت بحاول ابتسم عشان ميزعلش بس انا فعلا كان قلبي واجعني لغاية ما لقيته بيقول

• انا عارف ايه اللي هيغير مودك و مش بس هيغير مودك ده هيشقلب حياتك و حياتي انا كمان

• ايه بقا يا تري

• تتجوزي

• لا و الله 

• اه و الله ، بصي يا فريدة سيبك من الهزار انا بتكلم جد دلوقتي ، احمد صاحبي طلب ايدك مني و صدقيني انا متمناش ليكي غيره ، حقيقي حد كويس هو عايز ييجي في اقرب فرصه ، ايه اليوم المناسب ليكي ؟ …اقعدي اتعرفي عليه و اتكلمي معاه و ربنا يكتب لكم الخير

• معلش يا عمرو 

• معلش يعني ايه

• يعني انا مش عايزة افكر في الكلام ده دلوقتي

• اومال هتفكري فيه امتي يا فريدة

• لما اخلص رسالتي

• يا بنتي هو انا بقولك هتنجوزي بكره

• ارجوك يا عمرو 

• ارجوكي انتي يا فريدة، طب بس شوفيه يمكن يعجبك و انا متأكد  .. و الله عريس ميترفضش 

• عشان خاطري نأجل الكلام ده انا مخنوقه و مضغوطه

• يا حبيبتي محدش هيغصبك علي حاجه انتي شوفيه بس متخنقينيش ، طلعتوا عيني انتي و هو

• ………..

• طب بتعيطي ليه دلوقتي ، خلاص اسكتي ، اهدي و هنتكلم تاني بعدين

عمرو طلع من هنا و انا اتفتحت في العياط من هنا مش عارفه ايه كل العياط ده و خرجت من اوضتي بعد شويه و لقيت عمرو خرج من البيت ، حسيت براحه نسبيه هعيط براحتي و هخرج طاقتي براحتي

 عملت لي اكبر مج في المطبخ شاي بلبن و وقفت غسلت كل المواعين و نضفت البوتاجاز و الرخام و التلاجه و أرضية المطبخ و بدأت في تجهيز الغدا و لسه عندي طاقه و لسه بعيط بردو و مش مصدقه أن الوقت الصعب ده هيعدي و مش قادرة ابطل تفكير فيه …..

ماما جت و عملت لي تحقيق علي شكلي و علي الحاجات اللي عملتها في المطبخ و مصممه تعرف مالي و انا أصلا مش عارفه مالي 

@@  انا احمد 😐

مش عارف اشوف فريدة و لا عارف اكلمها و عمرو قالي استني شويه علي الاسبوع الجاي هخليك تيجي البيت تقعد معاها معرفش ليه مش الاسبوع ده ؟ ليه مش النهارده ؟ ليه مش دلوقتي ؟

انا قاعد و عمرو اهه قدامي و مش فاهم منه حاجه ، بيقول لي كلمتها و هخليك تيجي تقعد معاها بس مش دلوقتي. طب ليه ؟؟؟

انا لازم اخد خطوة بنفسي و مع اني جبت رقمها بس مش عارف ليه مش مقتنع بمكالمة تليفون 

انا حاسس انها زعلانه مني جدا و محتاج أوضح لها كل حاجه و مش هينفع التليفون

• انت يا بني رحت فين

• معاك يا عمرو ، كنت بتقول حاجه

• لا ياخويا و لا حاجه .. قوم بينا ، مش هتتفرج عالماتش ؟

• هنروح فين 

• قهوتنا العتيدة ملناش مكان غيرها

قمنا رحنا القهوة شفنا الماتش و روحت اتعشيت و نمت و صحيت تاني يوم مفيش في دماغي غير حاجه واحده ، انا رايح لها مكتبها مش هصبر اكتر من كده

فعلا لبست و طلعت علي الكليه و اول ما وصلت المكتب بتاعها اتصدمت انها إجازة و لسه عندها بكرة كمان إجازة

يا وجع القلب !

##  انا فريدة 🙁

خلصت اجازتي و هنزل النهارده الكليه ، لبست اي حاجه و ابتسمت في وش ماما و عمرو و انا مش سامعه همه بيقولوا ايه اصلا و نزلت .

 يا دوب وصلت المكتب لقيت سمر بتقولي في حد جه سأل عنك اول امبارح و مستنيكي في مكتبك و غمزت لي و خرجت من مكتب المعيدين
دخلت المكتب كان في حد قاعد جنب مكتبي ، قلبي اتنفض لما شفته و يا دوب خطيت خطوتين لقيته وقف و بص ناحيتي ، هو !!! بس لابس هدوم مختلفه تماما و شكله مختلف تماما و لسه هتكلم سبقني و اتكلم هو
ارجوكي قبل ما تقولي و لا كلمه اسمعيني هي حاجه واحده عايزك تعرفيها
و انا مش عايزة اسمعك و اتفضل اخرج لو سمحت
ارجوكي
طيب انا اللي هخرج
فريدة… انا بحبك
الكلمة جمدتني في مكاني
بحبك فوق ما تتخيلي ، و ارجوكي اسمعيني دقيقه و بعدها اعملي اللي انتي عايزاه…… انا مسميش حماده ، انا النقيب أحمد نصرالله صاحب عمرو اخوكي و انا اللي خطبتك منه و بحبك ………
بحبك و مش عارف اعمل ايه ، خطبتك من اخوكي ييجي ٢٧ مره و لولا أنه رخم كان زماننا متجوزين دلوقتي
متقولش علي اخويا رخم
اخوكي علي دماغي ، و بعدين يعني انتي سبتي كل ده و مسكتي في الكلمه دي ؟ انا بهزر
طب و البنت اللي كانت بتضحك معاك و مسكت ايدك
بنت ايه بس يا حبيبتي ، ما انا قلت لك ده كله ظروف الشغل و خلاص الشغل خلص مفضليش الا انتي ، صالحيني بقا يا فريدة و الا و الله العظيم هقف في طرقة الكليه و اقول باعلي صوت انا بحب فريدة الورداني و عايز اتجوزها😲
و ده تهديد كمان ؟  فكرك انا كده خفت مثلا 😊
كفايه ابتسامتك الجميله دي ، سيبك بقا من الشغل و الحاجات دي و تعالي انا عازمك علي شاي و شيكولاته
مينفعش ، انا عندي شغل🙂
هستأذن لك من العميد 😎، متستغربيش …لا ده انا جامد جدا متفكريش أن انا قليل 😎
لا انا فعلا في حاجات لازم اخلصها
خلاص انا قاعد هنا 
بجد 😳
اومال انا ههزر معاكي؟
اوكي براحتك
خلصى شغلك براحتك و علي أقل من مهلك
خلصت شغلي و خرجنا و رحنا كافيه قدام الجامعه هو اللي اختاره و لما سألته اشمعني يعني الكافيه ده
عشان كنت كل يوم اعدي عليه و احلم أن انا و انتي قاعدين فيه متخيلتش أن الحلم هيتحقق بالسرعة دي
للدرجه دي ؟
و اكتر بكتير , اتجوزيني يا فريدة
موافقه
طب يالله بينا حالا علي عمرو اخوكي
طب مش لما نشرب الشاي
هنشربه في بيتكوا قومي بس
احمد
نعم 
انا كمان بحبك
يا لهوى 😱❤️ ،  انا بقول نروح نجيب الشبكه وناخد المأذون فى ايدينا و بعدين نروح ل عمرو اهو نوفر وقت بردو 
هههههههههههه
تمت،

تعديل المقال