مشاكل اجتماعية للنقاش
حماتى منكده عليا حياتى
فى هذا المقال من مشاكل اجتماعية للنقاش اعرض لكم مشكلة عروسة مسكينة وقعت ضحية الاستغلال اقروا المشكلة و سأضع ردى عليها ايضا و انتظر ارائكم .. دمتم بخير
 |
| مشاكل اجتماعية للنقاش |
مشاكل اجتماعية للنقاش
انا عندي ٢٣ سنه اتجوزت من سنه و نص تقريبا بعد قصة حب كبيرة خطيبي شغال في السعوديه و كنا متفقين معاه أن انا بعد الفرح هسافر معاه و هنعيش هناك بعد الجواز بشهرين جوزي سافر علي اساس أنه هيبعت ياخدنيو بدأ يماطل في سفري
مره يقولي عشان لو سافرت معاه ساعتها هنصرف الدخل كله و هو اصلا دخله مش كبير لانه سواق
و بيقولي أنه عايش في سكن مشترك مع عمال مصريين غيره و لو سافرت ده هيجبره ياخد مكان لينا لوحدنا تكلفته هتبقي كبيره
و مره يقول لي أنه نفسه أن انا افضل في مصر عشان اخد بالي من أمه لانه هو كان اصغر واحد و بعد جوازه البيت هيفضي عليها
و لو اشتكيت من اي حاجه يقول لي حرام عليكي انا في غربه متقليش عليا
و احيانا بيقعد يومين و تلاته ميردش على رسائلي و مكالماتي
و انا هطق من الغيظ
انا قاعدة في بلد ارياف في شقه جوه نفس البيت اللي عايشين فيه سلايفي و حماتي
جوزي بيزل إجازة كل سنه مره
و رغم أن بيت اهلي قريب مش بعيد بس حماتي مبترضاش تخليني اروح ازور اهلي
لما جوزي بيكون هنا بقعد انا و هو في شقتنا و اول ما بيمشي حماتي بتطلب مني اروح اقعد و اكل و اشرب و اقضي اليوم كله معاها
انا عندي اتنين سلايف مفيش واحده فيهم بتيجي تقعد مع حماتي بحجة أنهم مشغولين مع اجوازهم و عيالهم و انا الوحيدة اللي فاضيه
حاسه بخنقه فظيعه و ملل و مبعرفش اتكلم مع حماتي كلمتين علي بعض
انا حاسه اني عايشه في سجن و لو قلت لها اروح اقعد عند اهلي شويه بتقول لي ساعتين بس و ترجعي و لو معملتش اللي هي عايزاه بالظبط
اول ما جوزي يكلمها تشتكي له مني
و دايما عايشه في شخصية الطيبة الحقانيه الغلبانه اللي متزعلش حد ابدا
و هي مخلياني كل حاجه بعملها بحساب و حاسه اني تحت المراقبة علي طول و مهما عملت لها مبتشكرش
معرفش ليه ؟؟
نفسي مره تحسسني أنها شايلالي جميل ، لكن ابدا
محسساني أن ده العادي و كمان مش راضيه عني
و سلايفي مرتاحين عالاخر
اتكلمت مع جوزي بس هو قال لي يعني عايزاني اعمل لك ايه؟ دي امي
يصحي من النوم اروح لها و افضل قاعده عندها لغاية ما تنام وقتها بس اقدر اروح شقتي
حتي التلفزيون بتفرج علي مزاجها
و كل شويه تعزم بنتها المتجوزة و تخليني اطبخ للعزومه و اغسل كوم مواعين و أنضف مكان زيارة أخت جوزي هي و عيالها
بصراحه انا مبقيتش مستحمله العيشه دي
من يومين بقي سمعتها و هي بتقول ل جوزي انا عايزة مراتك تنام عندي هنا في البيت عشان انا ساعات بتعب بالليل
انا اتصدمت يعني مش مكفيها اللي بتعمله فيا في النهار كمان ايات عندها ؟؟
انا مبعرفش انام الا في بيتي و مبرتاحش الا في بيتي
ما بصدق اصلا اليوم يخلص عشان اروح شقتي
انا مش عارفه اعمل ايه
عايزة اقول ل جوزي يا اما افضل في شقتي يا اما اروح اقعد عند اهلي لغاية ما يرجع من السفر
لو اي حد عنده حل او مر بتجربة شبه دي يقول لي عشان انا هتجنن خلاص
كده المشكلة خلصت و ده كان ردى عليها
بصي بقي يا ست البنات
الناس دي بتستعبط و انا بعتذر عن اللفظ
بس المفروض انك اتجوزتي شخص عشان تعيشي معاه هو شخصيا
انتي رحتي البيت ده بصفتك زوجه مش بصفتك جليسة لسيدة كبيرة في السن و لا بصفتك ممرضه و لا خادمه
كون انك قاعده في البيت و زوجك غير موجود ده تفضل و كرم كبير منك
خصوصا أن مفيش اولاد يعني انتي تعتبري عروسه
و اوعي تفتكري أنهم مش فاهمين الكلام ده كويس
و اوعي تفتكري أنهم يرضوا ده لبنتهم
بدليل أنها مدلعه بنتها علي حسابك
عارفه لو همه شايلين الجميل ليكي و بيعاملوكي باللي تستحقيه كنت قلت لك معلش اعتبريها زي والدتك و انك قاعدة معاها عشان خاطر جوزك
لكن جوزك بيقعد بالايام مبيردش
و مامته بتشتكي منك باستمرار
و سلايفك مكبرين دماغهم
ده مش وضع يتوافق عليه
انتي لو سكتي هيبقي ده أمر واقع و هيتفرض عليكي و هيبقي ده واجب عليكي
لازم تطلبي حقك لأنهم بيستغلوكي اسوء استغلال و محدش فيهم مقدر و لا شايل لك جميل
ميستاهلوش يا عروسه صدقيني
اطلبي من جوزك تقعدي في شقتك
و تنزلي تقعدي مع حماتك يوم و كل واحده من سلايفك يوم
لو وافقوا يبقي معلش تعالي علي نفسك و اقعدي
موافقوش يبقي تروحي علي بيت أهلك و تقولي له هرجع البيت لما انت ترجع بالسلامه
صدقيني لو فيه خير جواه ناحيتك و شاريكي و لو هو ابن حلال هيوافق علي طلباتك
لو موافقش يبقي هو كان واخدك تخدمي أمه مش اكتر
و ده حرام
حرام تبقي انتي اللي شايله لوحدك و محدش حاسس و لا مقدر
المساواه عدل
في انتظار ارائكم
لا تفوتوا قراءة قصة الساحل الشمالى