قصة وعبرة زوجتى و المدير

 عشان فريدة 

كلنا بنحب نقرا قصص حب رومانسية لانها بتغير حالتنا النفسية عشان قصص الحب عموما سواء كانت قصص قصيرة او روايات مش بس بتكون مسلية دى كمان بتخلينا نعيش مع الابطال جوه القصة و دى قصة عشان فريدة اتمنى تعجكوا و قراءة ممتعه              

قصة قصيرة بالعربية 

قصص حب قصيرة

الجزء الاول 

عمرو اخويا ظابط مباحث و مع أنه أكبر مني بخمس سنين بس , بحس أنه بيعاملني علي اني طفله صغيره و لازم كل يوم و هو راجع من شغله يجيب لي حاجه حلوه 

و مع اني مخلصه كليه من ٤ سنين و بذاكر للماجستير و قربت أناقش الرساله و بنزل كل يوم الشغل يعني متوافر فيا كل المقومات اللي تخليني لو عايزة حاجة حلوة اجيبها لنفسي بس بردو بستني الحاجه اللي هو هيجيبهالي 

##  انا فريدة 😊

انا عندي ٢٧ سنه بحالهم و بشتغل معيدة في كلية حاسبات ومعلومات

عندي سكشن بدري و مستعجله و مع ذلك أمي و عمرو بيصمموا اني افطر قبل ما انزل

• يا بنتي اقعدي كلي كده الاكل هينزل في رجليكي و تطولي اكتر ما انتي طويله و هبله 😁😁

• الله يسامحك يا عم مش هرد عليك 

• علي فكرة انا كنت جاي عندكم الكلية بتاعتكوا في مأموريه بس بسببك اترفضت و قلت احسن ما هو مش هتبقي فوق دماغي في البيت و في الشغل و رشحت احمد صاحبي يروح مكاني

• اخس عليك ده انا كنت هفرح و الله 

• تفرحي ايه يا بنتي انتي كنتي هتكشفيني

• علي اي حال انا لازم انزل اتأخرت

• مش عايزة حد يزق لك العربيه

• من فضلك مبحبش حد يتريق علي عربيتي , سلام

 نزلت من البيت و بعد المعاناة اليوميه مع العربيه دارت الحمد لله و مشيت .

وصلت الكليه و انا بركن في الجراچ لقيت واحد بيشاور لي تقريبا سايس بيساعدني اركن استغربت جدا انا اول مره اشوف سايس هنا من أمتي بيعينوا سايس ل جراچ الكليه المهم ركنت و نزلت لقيته بيقول لي 

• المفتاح يا استاذه بعد اذنك ✋

• ليه ؟

• ده النظام هنا 👌

• و مين إن شاء الله اللي عمل النظام ده

• أنا 😎, و بعدين ما كل الطلبة اللي معاهم عربيات سابوا المفاتيح من غير كلام , انتي لمضه ليه ! 

• طلبة 😳 و لمضة 😳😳 انت بأي حق تتكلم معايا كده اتفضل ابعد من طريقي انا مش فاضيه للتهريج ده .

• لا ما انتي مش هتمشي غير لما تديني المفتاح.

• انت زودتها جدا و لو ممشيتش من قدامي حالا هيكون لي تصرف تاني معاك.

انا مخدتش بالي من الانفعال أن صوتي علي و الأمين محمد  ( الأمن اللي بيقف علي البوابه )  جه علي صوتي و لقيته بيهديني

• صباح الخير يا بشمهندسه فريده , مالك بس ايه اللي مزعلك ؟

• بشمهندسه ؟؟ 🤔 دي بشمهندسه ؟!

انا بقا مقدرتش امسك نفسي و اتفتحت فيه

• اه بشمهندسه مش ماليه عين حضرتك و لا مش عاجباك

لقيته ابتسم كده و قال لا لا انا مقصدش حاجه انتي بس صغيرة و بعدين ازاي تقولي مش عاجباني قطع لساني لو اقول كده انا بعتذر لك , و تقدري تتفضلي طبعا يومك سعيد .

كان نفسي أقوله هيبقي سعيد ازاي بعد ماشفت وشك بس قلت عيب و استأذنت من الأمين محمد و مشيت .

خلصت شغلي و نزلت عشان اخد عربيتي لقيت نفس السايس قاعد علي كرسي في وسط الجراچ و قدامه ترابيزة صغيرة عليها كوباية شاي و اول ما شافني جايه من بعيد وقف و ابتسم بخجل بس بغلاسه في نفس الوقت و قال

• ارجو انك متكونيش شايله مني بعد اللي حصل الصبح 😌 

• حصل خير

• ما دام مكشره كده يبقي لسه زعلانه و مش مسامحاني 🙁

• يا استاذ هو انا اعرفك اصلا عشان ازعل منك او اسامحك ! عن إذنك.

الابتسامه اللي كانت علي وشه اتغيرت و حسيت إنه محرج جدا بصراحه انا زودتها بس هو يستاهل,

 روحت البيت و كملت يومي عادي بس بين وقت و التاني كنت بفكر اللي حصل بيني و بين السايس و أن انا احرجته مره اقول مكانش المفروض اتعامل معاه كده و مره اقول يستاهل 😊

الصبح نزلت الكليه بعد النقاش اليومي مع ماما و عمرو و دعوات ماما المعتاده ( أن ربنا يرزقني ب ابن الحلال) و غلاسة عمرو ( بذمتك يا ماما دي تنفع تشيل مسئولية بيت دي طفله ) 

 كنت بتضايق الاول من كتر دعوات ماما و غلاسة عمرو و أشد معاهم في الكلام  بس اتعودت خلاص مبقتش ارد , دخلت الكليه و ركنت عربيتي و السايس واقف بعيد عني شويه و عامل نفسه مش شايفني و ده ريحني الحقيقة.

طلعت خلصت شغلي و نزلت خدت عربيتي و دورت بعنيا مش شايفاه و بعدين اكتشفت أنه بيطلع عربيه من مكانها شاور لي و قال مساء الخير يا بشمهندسه قلت له مساء الخير و مشيت .

و بعدها التعامل بقا كده كل يوم مجرد صباح الخير أو مساء الخير من بعيد ل بعيد و خلاص و مع اني ما زلت مستغربه  أن في سايس عندنا في جراچ الكليه بقاله اهه اسبوع بيستلم مفاتيح العربيات الصبح و يسلمها اخر النهار بس طبعا ملوش دعوة بعربيتي

 الغريبه أن الجراچ كان صغير و مش مستاهل سايس و اصلا اغلب الدكاترة و المعيدين مبيركنوش عربياتهم فيه بس انا مالي 🙃

بعد الموقف الاولاني بحوالي ١٠ ايام و انا خارجه من الشغل و رايحه ادور عربيتي لقيت العربيه مش عايزة تتحرك … احاول فيها مفيش فايده, يمين شمال مفيش فايده, بصيت حواليا اشوف حد يساعدني كان في ٢ طلبه ناديت عليهم و فضلنا نحاول ندور العربيه و هي رأسها و الف سيف ما تتحرك

 طبعا السايس افندي واقف بيبص من تحت لتحت بابتسامه شريرة🤭 و كأنه بيقول نادي عليا مفيش في ايدك حل تاني قمت قلت لنفسي و الله لو هروح مشي مش هنادي عليك 🙄

بعد كام دقيقه لقيته جاي لوحده و بيقول 

• مساء الخير يا بشمهندسه تسمحي لي اساعدك ( بس بنفس الابتسامه الشريرة )

• شكرا هي خلاص كانت هتدور و الشباب معايا كتر خيرهم .

• طب معلش اسمحي لي كده و اتفضلي انتي ارتاحي  

اخد المفتاح و فضل يحاول معاها هو و الاتنين الطلبه لغاية ما دارت الحمدلله و الطلبه قالوا اي خدمه تاني يا بشمهندسه قلت لا شكرا كتر خيركم يا شباب.

جه هو اداني المفتاح و قال لي استأذنك بس في سؤال معلش 

• اتفضل

• انتي اسمك فريدة ايه ؟

• فريدة الورداني بتسأل ليه

• لقيته ابتسم ابتسامه كبيره جدا و قال معقول ؟

• هو ايه اللي معقول ؟

• لا و لا حاجه انتي بقا فريدة الورداني ؟

• اه و الله العظيم ! 

• هههههه مصدقك طبعا .

• و انت بقا اسمك ايه

• حماده 😁

• تشرفنا يا استاذ حماده

• الشرف ليا انا و السعاده كمان 

اول مره اشوفه مبسوط اوي كده و مش عارفه ليه بصراحه, و اول مره اكتشف هو اد ايه وسيم خصوصا لما بيضحك.

@@  انا حماده 😁😁

انا اسمي احمد نصرالله و بيدلعوني من و انا صغير يقولولي ( حماده ) انا مش سايس و لا حاجه رغم أن السايس مهنه جميله و كل مهنه شريفه هي مهنه جميله.

انا ضابط المباحث اللي جاي الجامعه اعمل تحريات عن واقعة تسريب امتحانات لمجموعه من الطلبه و معايا اتنين امناء شرطة شغالين جوه مبني الكليه بيعملوا شاي و قهوة

ادعوا لنا بالتوفيق 😊😊

الحقيقة انا جيت هنا بترشيح من  الرائد عمرو الورداني , ااااايوه اخو فريده ، انا من ساعة ما عرفت و مش مصدق  , ده كلام و لا في افلام الخيال العلمي 

, الحقيقه بردو انا كان لازم هشوفها و هعرفها لاني من ساعة ما جيت بحاول احتك بكل المعيدين و الدكاتره 

و حتي بكل الطلبه و الطالبات اللي مستوياتهم الماديه تسمح أنهم يشتروا امتحانات الترم و فكرة السايس كانت علي أساس أن في الغالب الطالب اللي قدر يدفع رشوة و ياخد الامتحان اكيد عنده عربيه ، يا رب بس يبقي توقعاتنا صح .

انا بس متخيلتش أن اللي عملت معايا الموقف السخيف ده تبقي اخت صاحبي ، مكدبش عليكوا دمها خفيف و عاجباني تحس انها خلطه من الرقه و الجمال الهادي و الادب و الشقاوة و شوية طولة لسان 😁😁

البنت دي من اول ما اتخانقت معايا أول مرة استفزتني حسيت اني عايز اعرفها و بقيت متابعها كل يوم مش زي ما بتابع الباقيين عشان شغلي 

معرفش ليه كان عندي دائما فضول ناحيتها و خصوصا بعد ما قالت لي : لو ممشيتش من قدامي حالا هتصرف معاك تصرف تاني ( من ساعتها كل ما افتكر اضحك و اقول ممكن يبقي ايه التصرف التاني هتضربني مثلا و هي شبه السنافر كده )

عجباني فريدة 💚 و اليوم خلص و انا بفكر فيها و في المفاجأة انها طلعت اخت صاحبي ،بس لازم اقوم اعمل لي سندوتش و انام بقا و الصباح رباح 😏

من ساعة ما جيت الكليه الصبح مستنيها معرفش مظهرتش ليه انا ناوي اعزمها علي حاجه و هي خارجه 🙈

اللهم ما طولك ياروح هي مجتش ليه 🤔🤔

اخييييييرا ظهرت عربيتها احمدك يا رب

وصلت و شاورت لها تركن في مكان معين حسب خطتي

صباح الخير يا بشمهندسه

• صباح النور .

• عامله ايه أتمني أن العربيه متكونش غلست عليكي.

• ده العادي هي مغلسه عليا باستمرار

• إن شاء الله تغيريها قريب

• إن شاء الله ، بس و الله انا بحب العربيه دي أصلها كانت بتاعة بابا الله يرحمه

• الله يرحمه ،ما تتفضلي تشربي حاجه 😊

• لا الف شكر متأخرة علي ميعاد سيكشني

• اوكي اتفضلي مش هعطلك 

و فضلت مستني مستني مستني ايه اليوم الطويل اللي مش بيخلص ده لغاية ما جت فريدة تاخد عربيتها و اول ما قربت عملت نفسي مشغول 😁😎

• استاذ حماده ازيك 

• اهلا و سهلا يا هندسه

• هي عربية مين اللي قافله عليا دي 

• دي تقريبا عربية حد من الطلبه انا معرفوش

• و ازاي بس سايبه يقفل عليا كده

• ده انا بس خرجت اجيب سكر من بره رجعت لقيته راكن و قافل العربيه حتي مش معايا المفتاح 🤭🤭

• تعالي اتفضلي اقعدي لغاية ما اشوف حل ، تشربي ايه ؟

• ده وقته بس يا استاذ حماده

• اولا انا اسمي حماده بس مش استاذ و ثانيا وقته طبعا ده حتي تلاقيكي عمرك ما قعدتي جنب جراچ ده انتي هتتبسطي خالص و كمان انا هكون سعيد لو شرفتيني و شربتي حاجه علي ترابيزتي المتواضعة دي اقعدي بس اقعدي خلي البساط احمدي 

• ماشي ،عندك ايه يتشرب ؟

• سخن و لا ساقع

• ساقع

• معنديش

• طب سخن

• معنديش بردو 😁😁

• اومال انا هشرب ايه

• في مياه لو عايزة و أحيانا بتبقي قاطعه بهزر بهزر متكشريش

• طب اشرب شاي 

• اووووكي و هجيب لك بسكوته معاه كمان إن شالله ما حد حوش

• 😊😊

قعدنا شربنا الشاي و اتكلمنا و ضحكنا ، اد ايه هي بنت لذيذة فعلا ، المصيبه بقا لما ييجي صاحب العربيه و تكتشف أن المفتاح معايا و انا اللي حابس عربيتها اصلا 😌

اهو جه 🤭

• ممكن مفتاح العربيه

• طب ممكن تيجي بعيد شويه

• ليه 

• هقولك تعالي بس 😊 المفتاح اهه بس خده كأنه كان معاك من الاول

• يعني ايه

• و لا حاجه اتفضل ( و عليت صوتي ) عشان عربيتك قافله علي عربية المهندسه فريده .

و قبل ما يلحق يرد حطيت ايدي علي كتفه و خليته يتحرك معايا لغاية باب عربيته و قلت له اتفضل مع الف سلامه في رعاية الله و كل ما ييجي يتكلم اقاطعه و اقول مع السلامه مع السلامه ، و عدت الحمدلله

رجعت عندها و قلت لها نورتي الجراچ يا بشمهندسه و الله

ابتسمت و قالت قصدك أمشي يعني ؟

• لا و الله ما اقصد خالص .

• بس انا فعلا لازم امشي .

• هشوفك بكره ، قصدي يعني لما تيجي تركني عربيتك .

• اه اكيد ، باي باي .

• مع السلامه .

مش قادر ابعد عنيا عنها لغاية ما بتطلع من بوابة الكليه و لو ينفع كنت طلعت جري وراها 😊

اغاني شغاله في دماغي مش عايزة تقف و بعدين بقا مع البنت دى ؟

##  انا فريدة 😊

معرفش في ايه انا ازاي وافقت اقعد اشرب الشاي مع واحد معرفوش و ليه مبقيتش متضايقه منه ليه عايزة ارجع تاني و ليه عايزة الصبح ييجي بسرعه عشان اشوفه

خرجني من حالة السرحان صوت باب اوضتي بيخبط

• اتفضلي يا ماما

• مش عايزة تتعشي

• لا يا ماما انا مش جعانه ، اقوم اعمل لك حاجه تاكليها 

• يا ريت بس تأكلي معايا ، و اعملي لنا شاي 

• شاي 🥰😁

• اه !! ماله الشاي بيضحكك ؟؟

• لا لا هعمل لك شاي حاضر 😊. 

صحيت الصبح و بعد الحوار بتاع ماما و عمرو اخيرا خرجت و ركبت عربيتي ومشيت و اول ما وصلت فضلت ادور عليه ب عنيا ، فجأه لقيته جنب العربية بالظبط بيبتسم لي و بيساعدني اركن 

• صباح الخير 😊

• صباح النور ، عامله ايه ؟

• تمام ، تحب تاخد مفتاح العربيه ؟

• انا لا أجرؤ 😌.

• طيب انا هطلع الكليه بقا .

الكلام خلص بسرعه و طلعت المبني بس بفكر فيه ! طب ليه!

سكشن و استلام مشروعات من الطلبة و متابعة رسالتي مع الدكتور المشرف و نزلت اروح بقا ، في الجراچ لقيته قاعد علي كرسيه و قدامه حاجات و قابلني بابتسامته المعتادة 😊

تحبي تشربي ايه 

• لا و لا حاجه

• مش ممكن لازم تشربي حاجه ( انا كنت واقفه جنب عربيتي و سانده ضهري عليها 

• لقيته جاي ناحيتي و في أيده حاجه ساقعه و شيكولاته ،😳نفس الشيكولاته اللي بيجيبهالي عمرو اخويا

• اتفضلي حاجه ساقعه عشان متقوليش أننا مقصرين معاكي في حاجه

• غريبه

• ايه هي اللي غريبه

• دي نفس الشيكولاته اللي بيجيبها لي اخويا الكبير

• اه ما انا اللي بروح اجيبها

• نعم ؟؟

• انا اللي لسه رايح و جايبها حالا يعني

• غريبه فعلا بس تعرف انت فيك كتير منه و زيه في تصرفات كتير

• زي مين 

• زي اخويا

• لا انا مش زي اخوكي ….متكشريش انا يشرفني طبعا ابقي شبهه في حاجات هو انا اطول

• بس انا مش بحب الحاجات الساقعه دي 

• اجيب لك عصير ؟

• لا ، انا همشي

• مش ممكن تمشي لازم تشربي حاجه ده حتي يبقي عيب في حقي

• ماشي هشرب شاي المرة دي بس دي اخر مره

• ليه ؟ انا يضايقك ؟

• لا بس عشان الوقفه هنا في الجراج عجيبه شويه

• ده انتي منورة الجراج

• 😊😊 .

وقفنا شربنا الشاي و اتكلمنا اد ايه هو انسان مهذب و دمه خفيف كل حاجه قالبها تريقه لدرجة أنه بيتريق علي نفسه

اخدت الشيكولاته حطيتها في شنطتي و سلمت عليه و مشيت

روحت البيت جهزت الغدا مع ماما و اتغدينا و دخلت اوضتي اريح شويه عشان عندي مذاكره بس حماده علي بالي ، حاسه ان الكليه اتغيرت و بقا في دافع تاني ليا عشان اروح الشغل

@@  انا حماده 😊

البنت اللي اسمها كارما دي مش مريحاني ، لبسها و شكلها و أسلوبها كلها علي بعضها كده مصطنعه و ممشيه وراها شله تحس انها الملكه و همه الاتباع ، لبسها واضح أنه غالي جدا و اكسسوارات كتير و مكياج تقيل و واضح انها من عيله حديثة الغني محتاج اعرف عنها معلومات زياده هعمل نفسي بتعرف عليها 

• صباح الخير يا استاذة ….

• كارما ، اسمي كارما 

• انا اخدت بالي انك راكنه عربيتك في الشمس تحبي اساعدك تغيري مكانها

• ميرسي ، اوكي و لا اقولك خد المفتاح و اركنها انت ،بااااي .

شاورت لها و قلت بصوت واطي يا بااااااي ، رمت لي المفتاح في الهوا ، لازم الاقي طريقه افتح معاها كلام و مش عارف اعمل ايه ، 

يا الهي طل القمر

• اهلا اهلا يا بشمهندسه

• اهلا بك ، صباح الخير

• صباح الفل

• 😊

• الدنيا بتحلو فجأه لما انتي بتوصلي ، مع اني ببقي شايفك من قبل ما تيجي

• ازاي يعني ؟؟☺️

• لماذا اراك على كل وجه  .. كأنك في الأرض كل البشر .. كأنك درب بغير انتهاء.. و اني خلقت لهذا السفر .. إذا كنت اهرب منك اليك .. فقل لي بربك اين المفر .

• فاروق جويده كمان ؟ 

• لا متاخدنيش بشكلي المبهدل ده ، دي بس ظروف الشغل لكن انا جامعي .

• و خريج ايه بقا

• هقولك كل حاجه بعدين ، ارجوكي اشربي معايا الشاي النهارده

• مش هينفع و الله الوقفه هنا مش تمام

• خلاص انا هتصرف

• تتصرف ازاي

• ملكيش دعوة انتي انا قلت لك هتصرف يالله اطلعي على شغلك يومك سعيد ❤️ .

و بعد ما هي طلعت مباشرة و انا لسه عندي حماس طلعت بره في الشارع اللي قدام الكليه و اتصلت علي عمرو اخوها

• الو ازيك يا عمرو 

• الله يسلمك ، طمني في جديد ؟

• لا و هعمل تقرير آخر النهار اشرح لكم فيه كل حاجه ، انا بتصل عشان حاجه تانيه دلوقتي

• خير

• من غير لف و دوران انا شفت البشمهندسه فريدة اختك

• طيب كويس 

• و عايز اطلب أيدها منك

• كده ؟  في التليفون ؟

• خلاص انا جاي اقابلك

• تقابلني فين يا بني اهدي بس

• خلاص هاجي لكم البيت انا و ابويا

• يا ابني استهدي بالله انت في مأموريه المفروض انك متنكر ، انت كده هتفضح نفسك و تبوظ كل حاجه

• طب انا عايز أخطب اختك اعمل ايه

• خلص شغلك يا احمد و هنتكلم … فريدة مش هتطير

• ارجوك يا عمرو اديني كلمه

• يا عم اديلك كلمه ازاي بالنيابة عنها هو انا اللي هتجوز ، مش لازم هي توافق 

• خلاص اسألها

• احمد !! اعقل و كمل شغلك و اللي فيه الخير يقدمه ربنا .

و بعدين بقاااا ؟ طب اطلب أيدها منها هي شخصيا

طب اعمل ايه انا ؟ و انا ماشي محتار و بفكر لقيت  مطعم فول و طعميه قدامي جبت لي سندوتشبن و دخلت تاني الجراچ و مفيش قدامي غير اني اكل و اشرب شاي 🙄

عدي يا وقت..عدي يا وقت..

## اهلا اهلا استاذة كارما ايه الاخبار

• تمام و انت اخبارك ايه

• اتفضلي افطري معايا

• ميرسي 

• ايه مبتاكليش الطعميه

• بالعكس ، بس مش باكلها الا من مكان معين

• اتفضلي مفاتيح العربيه

• لا افتحهالي بس انا مش خارجه بيها دلوقتي هاخد منها حاجه و ادخل الكليه .

• تمام .

انا عارف ان البنت دي و شلتها همه مفتاح اللغز ، يا رب نخلص من المأموريه دي بقا

 في الأيام القليلة اللي بعد كده بقيت بكل الطرق احاول اقوي علاقتي ب كارما و بشلتها و بقوا ييجوا يقعدوا عندي في الجراچ و اتعودوا خلاص أن فطارهم كل يوم عندي

 المشكله اني مش عارف اتكلم مع فريدة خالص ده انا بسلم عليها بالعافيه و هي مكشره في وشي مش عارف ليه

الجزء الثانى من هنا

تعديل المقال